Дарҳои кушода ба сўи илму маърифат

Душанбе, 14.03.2016 (АМИТ «Ховар»). — 12 март дар Донишкадаи соҳибкорӣ ва хизмат рӯзи дарҳои кушод баргузор гардид. Дар чорабинӣ ҳайати профессорону омўзгорони донишкада фаъолона иштирок намуданд. Хонандагон аз макотиби таҳсилоти миёнаи умумӣ, литсейҳо, коллеҷҳои шаҳри Душанбе ва навоҳии атроф ба донишкада омаданд.
Бо хонандагон дар синфхонаҳои таълимӣ, озмоишгоҳҳо, толорҳои варзишию лексионӣ, китобхонаи электронӣ вохӯриҳо ташкил шуда, оид ба имкониятҳои донишкада, ихтисосҳое, ки аз рўи онҳо дар донишкада мутахассисон тайёр мешаванд, заминаи моддию техникӣ ва дигар масъалаҳои вобаста ба таълим суҳбат ороста шуд. Хатмкунандагони муассисаҳои таҳсилотии миёнаи умумӣ ва миёнаи касбӣ нисбат ба ихтисосу тахассусҳои донишкада таваҷҷуҳи зиёд зоҳир намуданд.