Ҷаласаи Комиссияи вилоятӣ оид ба омодагӣ ва гузаронидани мусобиқаи ҷумҳуриявӣ бахшида ба 25-солагии Истиқлолият

Душанбе, 12.04.2016. /АМИТ Ховар/.- 8 апрели соли равон ҷаласаи васеи Комиссияи вилоятӣ оид ба омодагӣ ва гузаронидани мусобиқаи ҷумҳуриявӣ бахшида ба 25- солагии Истиқлолияти давлатӣ бо иштироки раисон ва котибони комиссияҳои шаҳру ноҳияҳо дар шаҳри Қурғонтеппаи вилояти Хатлон доир гардид.
Дар кори ҷаласа гурӯҳи корӣ бо роҳбарии Бег Қурбонзода, муовини якуми раиси Кумитаи рушди маҳали назди Президенти Ҷумҳурии Тоҷикистон, Д.Валиев, муовини сардори Раёсати банақшагирӣ ва арзёбии барномаҳои рушди маҳал, Х.Хайруллоев, мутахассиси пешбари Раёсати банақшагирӣ ва арзёбии барномаҳои рушди маҳал Ю.Қурбонов, котиби масъули комиссияи Кумита оид ба баргузории мусобиқа низ иштирок доштанд.
Зикр карда шуд, ки оид ба омодагӣ ва гузаронидани мусобиқаи ҷумҳуриявӣ бахшида ба 25-солагии Истиқлолияти давлатӣ Қарори раиси вилояти Хатлон аз 31 марти соли 2016 ба тасвиб расида, ба 25 шаҳру ноҳияҳои вилоят ирсол карда шудааст.
Дар ҷаласа қоидаҳои гузаронидани мусобиқаи ҷумҳуриявӣ бахшида ба 25-солагии Истиқлолияти давлатии Ҷумҳурии Тоҷикистон барои муайян намудани мақомоти марказӣ, вилоят, шаҳр, ноҳия, шаҳрак, деҳот, деҳа, маҳаллаи беҳтарин, оила ва хонаи намунавӣ хотирнишон гардиданд.
Дар ҷараёни ҷаласа дар бораи методологияи арзёбии нишондодҳо ва баҳогузорӣ ҳангоми муайян намудани ҷамоат, шаҳрак, деҳот, деҳа, маҳаллаи беҳтарин, хона ва оилаи намунавӣ дар баргузории мусобиқаи ҷумҳуриявӣ маълумоти муфассал пешниҳод карда шуд.
Комиссия масъулини шаҳру ноҳияҳои вилоятро бобати дар сатҳи баланд гузаронидани мусобиқаи ҷумҳуриявӣ вазифадор намуд.