Муаллимаи мактаби президентӣ «Омӯзгори беҳтарини соли 2016» шуд

Хоруғ, 19.04.2016. /АМИТ «Ховар»/. Соли равон панҷ нафар аз омӯзгорони макотиби шаҳр ба даври ниҳоии озмуни «Омӯзгори беҳтарини соли 2016» роҳхат гирифтанд. Яке аз ду шарти асосии озмун таҳлилу баррасии дарс ва посух додан ба суолҳои ҳакамон буд. Муаллимаи синфҳои ибтидоии мактаби президентӣ Нилуфар Сабоиева нисбат ба ҳамкасбони худ дарсҳоро бо шеваю диди нав таҳлил намуд. Бартарии шеваи баргузории дарси ӯ ин буд, ки ҳеҷ як хонандаи синф аз аз таҳлили мавзӯъ дар канор намонд ва ҳамагӣ барои аз худ кардани он фаъол буданд. Нилуфар ҳамчунин ба суолҳои иловагии ҳакамон ва намояндагони шуъбаи маорифи шаҳр посухҳои дурусту саҳеҳ дода, дар ҷамъбасти озмун 82,5 хол ба даст овард ва соҳиби унвони «Омӯзгори беҳтарини соли 2016» ва мукофоти пулӣ гардид.
Бо пешниҳоди ҳакамон ҳамчунин ба чаҳор омӯзгори фаъоли мактабҳои шаҳр ифтихорнома ва мукофоти пулӣ тақдим карда шуд.