Намоишгоҳи байналмилалии таълимӣ, сайёҳӣ ва инноватсионӣ-2016 оғоз шуд

Душанбе, 19.04.2016 /АМИТ «Ховар»/. Имрӯз дар меҳмонхонаи «Шератон»-и шаҳри Душанбе 18-умин намоишгоҳи байналмилалии таълимӣ, сайёҳӣ ва инноватсионӣ-2016 баргузор гардид.
Ба иттилои муовини директори ширкати муштараки байналмиллалии Тоҷикистон-Малайзия «ТМ-International» Саидҷон Абдуллоев, дар намоишгоҳи мазкур аз 6 давлат намояндагон донишгоҳҳои худро муаррифӣ мекунанд ва омодаанд ба довталабоне, ки дар ин донишгоҳҳо хоҳиши таҳсил карданро доранд, маълумоти лозимӣ пешниҳод кунанд.
Ҳадаф аз роҳандозии намоишгоҳ густариш додани ҳамкорӣ байни кишварҳои хориҷӣ, омода намудани мутахассисони касбӣ, фароҳам овардани фазои мусоид барои мубодилаи иттилоот миёни донишгоҳҳо ва ҳамчунин ба толибилмону донишҷӯён фароҳам овардани имконият барои гирифтани маълумоти нав оид ба муассисаҳои таълимии хориҷӣ мебошад.
18-умин намоишгоҳи байналмилалии таълимӣ, сайёҳӣ ва инноватсионӣ-2016 дар Душанбе 2 рӯз идома ёфта, 21 апред дар шаҳри Қурғонтеппа ва 23 апрел дар шаҳри Хуҷанд баргузор мегардад.