Омодагиҳо ба ифтихори ҷашнҳои Ваҳдати миллӣ ва 25-солагии Истиқлолияти давлатӣ

Ваҳдат,19.04.2016/АМИТ«Ховар»/. Ҳунармандони шуъбаи фарҳанги шаҳри Ваҳдат барои дар сатҳи баланд гузаронидани ҷашни Ваҳдати миллӣ  ва 25-солагии Истиқлолияти давлатӣ барномаҳои рангини ҳунарии «Ваҳдат саодат аст», «Файзи истиқлол» ва Фестивал-озмуни ҷумҳуриявии телевизионии эҷодиёти халқ «Андалеб-2016»-ро омода мекунанд.

Мудири шуъбаи фарҳанги шаҳри Ваҳдат Эркамоҳ Мирзоева иброз намуд, ки ҳадафи асосии баргузории чунин барномаҳои рангину фестивал-озмунҳо дарёфти истеъдодҳои нав, санҷиши неруҳои зеҳниву эҷодии муассисаҳои фарҳангӣ, тақвият бахшидани вазифаҳои иҷтимоии онҳо дар эъмори ҷомеаи навбунёди Тоҷикистон ва дар ин замина баланд бардоштани нақши онҳо дар раванди тарбияи маънавии шаҳрвандон, бахусус насли наврас дар рӯҳияи хештаншиносӣ, ватандӯстӣ, ифтихори миллӣ, арҷгузорӣ ба мероси ғановатманди фарҳанги миллӣ ва намоиш додани дастовардҳои ҳунарию фарҳангии 25  соли даврони истиқлолият аст.