Парлумон ба Кодекси граждании ҶТ иловаҳо ворид менамояд

Душанбе, 25.04.2016 /АМИТ «Ховар»/. Интизор меравад, ки  вакилони  палатаи  поёнии Парлумони  Тоҷикистон ба Кодекси граждании Ҷумҳурии Тоҷикистон  иловаҳо ворид намоянд.
Масъалаи мазкур 25 апрел дар ҷаласаи Шӯрои палатаи поёнии Парлумони  кишвар таҳти раёсати Шукурҷон Зуҳуров, Раиси Маҷлиси  намояндагон баррасӣ шуд.  Аъзои Шӯрои Маҷлиси намояндагон ҳамчунин  лоиҳаи қонунҳои Ҷумҳурии Тоҷикистон «Оид ба ворид намудани илова ба Қонуни Ҷумҳурии Тоҷикистон «Дар бораи маориф», «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи иҷораи молиявӣ (лизинг)», «Дар бораи танзими давлатии ҳосилхезгардонии заминҳои таъйиноти кишоварзӣ», «Дар бораи заминсозӣ» ва «Дар бораи низоми иҷозатдиҳӣ»- ро муҳокима намуда, пешниҳодҳо ироа карданд.
Дар фарҷом баъзе аз масъалаҳо барои  баррасӣ ба кумитаҳои Маҷлиси намояндагон ва бархеи дигар ба  ҷаласаи навбатии иҷлосияи  дуюми Маҷлиси намояндагон ирсол карда шуд.