Ситоиши Ҳамоиши байналмилалии адибони ҳавзаи Наврӯз дар ВАО-и Эрон

Душанбе, 15.04.2016 /АМИТ «Ховар/. Ҳамоиши байналмилалии адибони ҳавзаи Наврӯз, ки бо ташаббуси Асосгузори сулҳу Ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар рӯзҳои таҷлили ҷашни Наврӯзи Аҷам дар Ҷумҳурии Тоҷикистон баргузор гардид, аз ҷониби кишварҳои иштирокдор баҳои баланд гирифта, дар расонаҳои ин давлатҳо хабару гузоришҳо ва аксҳои ҷолиб роҷеъ ба мизбонии Тоҷикистон ба табъ расиданд.
Аз ҷумла, дар шабакаҳои ТВ «Хабар», «Канали 6» ва IRIB. IR, маҷаллаи «Бухоро», радиои «Садои Хуросон», шабакаҳои иҷтимоии «Толори Иронтоҷ», «Ватани форсӣ» ва «Телеграм»-и Ҷумҳурии Исломии Эрон зикр шудааст, ки баъд аз ҷаҳонӣ гардидани Наврӯз ва пазируфтани он аз ҷониби Созмони Милали Муттаҳид дар кишварҳои ҳавзаи Наврӯз, Тоҷикистон тавонист чандин бор онро дар сатҳи баланд ва бо иштироки кишварҳои минтақа ва ҷаҳон баргузор намояд.
Адиб Муҳаммадкозими Козимӣ, ки иштирокдори бевоситаи ин ҳамоиш буд, дар шабакаи «Ватани форсӣ» таҳти унвони «Пули пайванд» чунин изҳор дошт: «Ин аввалин сафари ман ба кишвари адабиётдӯст буд. Ман пеш аз ин ҳам аз фарзонагӣ ва меҳмоннавозии тоҷикон бисёр шунида будам, вале он чӣ дар ин сафар дидам, фаротар аз интизор буд. Мардум ҳама дар Наврӯзгоҳ ҷамъ меоянд ва бо роҳбари кишвар Президенти Ҷумҳурии Тоҷикистон Эмомалӣ Раҳмон бо гузориши пурмуҳтаво оид ба суннатҳои наврӯзӣ, шеърхонӣ бо лаҳни ширини дарӣ ва суруду мусиқӣ онро таҷлил менамоянд. Мардуми тоҷик анъанаи хуби дигар – гиромидошти бузургони худро ба сурати ёдгорӣ бо гулгузорӣ зери ҳайкалҳо пос медоранд ва дар арафаи Наврӯз шабҳои эҷодии шоирону адибонро бо иштироки шогирдон ва меҳмонони аз дуру наздик баргузор менамоянд».
Алии Деҳбошӣ дар маҷаллаи «Бухоро» чунин овардааст: «Хушбахтона, имсол Наврӯзи ман дар Тоҷикистон гузашт ва дар ин ҷашни бошукӯҳ намояндагони форсизабонони тамоми ҷаҳон гирд омада буданд. Дар доираи сафарам дар Симпозиуми илмии байналмилалӣ бахшида ба Наврӯзи ҷаҳонӣ дар шаҳри Душанбе-пойтахти Тоҷикистон, ки бо иштирок ва суханронии пурмуҳтавои Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон хеле ҷолиб гузашт ва дар он олимону пажӯҳишгарони тоҷик, меҳмонони хориҷӣ, донишмандону муҳаққиқони 15 кишвари ҷаҳон иштирок варзиданд, ширкат кардам. Дар ҳамоиш суннатҳои ҷомеасозиву инсонсозии Наврӯз дар замони муосир дар арафаи ҷашни ҷаҳонии Наврӯз ва масоили назарии омӯзиши таъриху фалсафа, таҷассуму бозтоби ғояҳои Наврӯз дар адабиёти ҷаҳон, мусиқӣ дар ҳавзаи кишварҳои Наврӯз ва Шоҳроҳи бузурги Абрешим мавриди баррасӣ қарор гирифтанд.
Иштирокдорони Ҳамоиш аз сатҳи баланди пешвоз ва истиқбол намудани меҳмонон дар тамоми минтақаҳои Тоҷикистон ва барномаҳои фарҳангии наврӯзии Тоҷикистон дар шигифт афтоданд ва минатдории худро ба Президенти Ҷумҳурии Тоҷикистон муҳтарам Эмомалӣ Раҳмон, мардуми шарафманди Тоҷикистон ва Иттифоқи нависандагони Ҷумҳурии Тоҷикистон иброз намуданд».
Мавриди зикр аст, ки ду нафар адиби афғонитабори муқими шаҳри Машҳади Ҷумҳурии исломии Эрон Муҳаммадкозими Козимӣ ва Зайнаб Баёт таассуроти сафари худ ба Тоҷикистон дар шакли китоб бо номи «Сафарнома аз Наврӯзи Тоҷикистон», ки дарбаргирандаи ойину тантанаҳои Наврӯзи Тоҷикистон, пос доштани фарҳанг ва суннатҳои наврӯзӣ, бунёди маконҳои боҳашамат, рушди Тоҷикистон, андешаҳои ҳамватанони бурунмарзӣ бо аксҳои ҷолиб аз ин ҷашнвора мебошанд, барои нашр манзур намудаанд.