Таҳкими равандҳои соҳибкории дорои тамоюли содиротӣ ва ивазкунандаи воридот

Душанбе, 25.04.2016. /АМИТ «Ховар/. Масъалаи   таҳкими равандҳои соҳибкории тамоюли дорои содиротӣ ва ивазкунандаи воридот дар шароити буҳрони иқтисодии ҷаҳонӣ аз масъалаҳои мубрам ба ҳисоб меравад. Ин нукта зимни конфронси илмӣ, ки таҳти унвони «Соҳибкории тамоюли содиротидошта ва ивазкунандаи воридот: вазъи муосир ва рушди инноватсионӣ» дар Донишкадаи соҳибкорӣ ва хизмати пойтахт доир гардид, иброз гардид.
Муовини  ректори донишкада оид ба корҳои таълим Самариддин Низомов иброз дошт, ки истифодаи иқтидорҳои дохилии мамлакат ҷиҳати истеҳсоли маҳсулоти ватании ба рақобат тобовар ва ба бозори ҷаҳонӣ таҳвил додани он аз муҳимтарин паҳлуҳои сиёсати давлат ва ҳукумати мамлакат мебошад. Маҳз бо ворид намудани иқтидорҳои захиравии ҷумҳурӣ ба истеҳсолот мо метавонем ба бунёди ҷойҳои  корӣ ва боло бурдани сатҳу сифати зиндагии сокинони мамлакат замина гузорем.
Дар конфронс инчунин ба масъалаҳои ташаккули сиёсат дар самти  ивазкунии воридот дар саноати Ҷумҳурии Тоҷикистон, татбиқи низоми баҳисобгирии хароҷот аз рӯи функсия (АВС) дар ҷараёни буҷетикунонии амалиётӣ ва самтҳои асосии натиҷаи таҳаввулоти бозорӣ дар кишварҳои Аврупо диққат дода шуд.