Васеъ ба роҳ мондани соҳибкории истеҳсолии хурду миёна бо истифодаи ашёи хоми ватанӣ

Душанбе, 12.04.2016 /АМИТ «Ховар/. Дар Ҷаласаи XVI Шӯрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ, ки имрӯз дар шаҳри Душанбе таҳти раёсати Сарвазири мамлакат Қоҳир Расулзода доир гардид, роҳбари ҶДММ «Мадина ва ҳамкорон» Набот Додхудоев оид ба фаъолияти бахши хусусӣ бобати иҷрои супоришҳои протоколи ҷаласаҳои қаблии шӯро, таъсиси ҷойҳои нави корӣ, ба таври васеъ ба роҳ мондани соҳибкории истеҳсолии хурду миёна бо истифодаи ашёи хоми ватанӣ, азхудкунии сарватҳои табиӣ ва истеҳсоли моли ниҳоӣ аз онҳо, пурра ба коркард фаро гирифтани меваю сабзавоти дар кишвар истеҳсолшаванда андешаҳои худро баён намуд.
Оид ба натиҷаҳои фаъолияти гурӯҳи корӣ оид ба беҳтар намудани фазои сармоягузорӣ дар соҳаи кишоварзӣ ва рушди тиҷорати аграрӣ вазири кишоварзии Ҷумҳурии Тоҷикистон Изатулло Сатторӣ гузориш дод. Аз ҷумла, ҳисоботи гурӯҳи корӣ бо тавсияҳои мушаххас ва лоиҳаи нақшаи чорабиниҳои Ҳукумати мамлакат оид ба беҳтар намудани фазои сармоягузорӣ дар соҳаи кишоварзӣ ва рушди тиҷорати аграрӣ муаррифӣ карда шуд.
Роҳбари Ассотсиатсияи агробизнеси Тоҷикистон Ш. Шораҳматов оид ба як қатор масъалаҳои соҳа ибрози назар намуд. Аз ҷумла, вобаста ба лоиҳаи «Дастурамал дар бораи баҳисобгирии муҳосибавӣ дар хоҷагиҳои деҳқонӣ (фермерӣ)-и хурд, миёна ва калон» зикр карда шуд, ки ҷорӣ намудани он фаъолияти хоҷагиҳои деҳқониро боз ҳам мушкил гардонида, ба самаранокии фаъолияти кишоварзӣ таъсири манфӣ мерасонад. Ҳуҷҷати мазкур хароҷоти иловагиро ба миён оварда, таваҷҷуҳи соҳибкорон ва сармоягузоронро ба фаъолияти кишоварзӣ коҳиш хоҳад дод.
Вазири рушди иқтисод ва савдои кишвар Неъматулло Ҳикматуллозода оид ба натиҷаҳои таҳлили пешакии мушкилиҳои низоми андозбандӣ ва роҳҳои ҳалли он гузориш дод.
Дар ин замина бо мақсади таъмини рушди бемайлони фаъолияти соҳибкориву сармоягузорӣ як зумра тавсияҳо барои беҳтар намудани сиёсати андоз ва маъмурикунонии он пешниҳод гардид.
Котиби масъули шӯро Қодири Қосим масъалаи беҳтар намудани фазои сармоягузориву соҳибкорӣ дар соҳаи нақлиётро барои баррасӣ дар ҷаласаи ояндаи Шӯрои машваратӣ пешниҳод намуд, ки он аз ҷониби аъзои шӯро дастгирӣ ёфт.
Вобаста ба масъалаҳои дахлдори ҷаласа намояндагони бахши хусусӣ ва шарикони рушд низ сухан гуфтанд.