Хуҷанд : Бунёди 72 иншоот ба ифтихори 25- солагии Истиқлолияти давлатии Тоҷикистон

Хуҷанд, 04.05.2016 /АМИТ «Ховар»/. Дар маркази вилояти Суғд- шаҳри Хуҷанд мутобиқ ба нақшаи чорабиниҳои мақомоти иҷроияи ҳокимияти давлатии шаҳр бахшида ба ҷашни бузурги кишвар- 25-солагии Истиқлолияти давлатии Ҷумҳурии Тоҷикистон 72 иншоот ба истифода дода мешавад. Аз ҷумла, 20 корхонаи саноатӣ, 20 хонаи истиқоматии баландошёна бо марказҳои савдо, 1 мактаб, 3 кӯдакистон, 2 толори варзишӣ, 22 майдончаи варзишӣ, 4 майдони футболи хурд, 1 меҳмонхонаи 5 ситорагӣ ва инчунин бинои 9 ошёнаи хизматӣ барои кормандони соҳаи буҷетӣ ва ҳифзи иҷтимоӣ ба истифода дода мешаванд.
Тавре масъулин аз мақомоти шаҳри Хуҷанд ба АМИТ «Ховар» иттилоъ доданд, аз аввали сол то ин дам 6 коргоҳи нави хурду миёнаи истеҳсолӣ бо ташкили 110 ҷои корӣ ба фаъолият шурӯъ карда, шумораи умумии онҳо ба 166 адад расонида шудааст. Инчунин дар ин радиф, 3 адад иншооти коммуналӣ ва иҷтимоӣ, 5 адад майдончаи варзишӣ ба истифода дода шуда, дар самти ободонӣ ва сарсабзгардонии кӯчаву хиёбонҳои шаҳр ба маблағи 166,7 ҳазор сомонӣ корҳо иҷро гардидаанд.