Ш. Зуҳуров бо роҳбарони баландпояи Русия қазияи дар оромгоҳи Хованский бавуқуъомадаро матраҳ менамояд

Душанбе, 16.05.2016/АМИТ «Ховар»/. Шукурҷон Зуҳуров -раиси палатаи поёнии Парлумони Тоҷикистон зимни сафари корӣ ба Русия, ки фардо, 17 май сурат мегирад, бо роҳбарони баландпояи Русия мулоқот намуда, ҷараёни тафтишоти ҳаводиси нангини 14 май дар оромгоҳи Хованскийи Маскав баамаломадаро ба таври ҷиддӣ матраҳ менамояд.
Аз Маҷлиси намояндагон ба АМИТ «Ховар» иттилоъ доданд, ки ҳамзамон Шукурҷон Зуҳуров субҳи имрӯз ба роҳбарони вазорату идораҳои салоҳиятдори кишвар супориш додааст, ки барои мунсифона тафтиш намудани қазияи дар оромгоҳи Хованский рухдода ҳамкориро бо мақомоти ҳифзи ҳуқуқ ва тартиботи Русия ба роҳ монда, тақвият бахшанд.