Намоиши дастовардҳои ҳунарии сокинони Рашт дар «Боғи Ирам»

Душанбе 13.06.2016/АМИТ «Ховар/.  12 июн «Боғи Ирам»-и пойтахт шукуҳи хосса дошт. Дар ин ҷо барои истиқболи сазовори  ҷашни 25-солагии Истиқлолияти давлатии Ҷумҳурии  Тоҷикистон маҳсули дастони ҳунармандон ва кишоварзони ноҳияи Рашт ба намоиш  гузошта шуд.  Инчунин дар маҳфили фарҳангӣ ҳунармандони шуъбаи фарҳанги ноҳия Рашт бо  барномаи ҷолибу хотирмони консертӣ, ки аз созу наво, суруду таронаҳои дулошӯб ва рақсҳои марғуб иборат буд,  хотири меҳмонону ҷамъомадагони «Боғи Ирам»-ро болида намуданд.
Аз Вазорати фарҳанги ҷумҳурӣ ба АМИТ «Ховар» иттилоъ доданд, ки чунин чорабиниҳои фарҳангӣ бо ташаббуси Ҳукумати Ҷумҳурии Тоҷикистон  ба ифтихори истиқболи сазовори ҷашни 25-солагии Истиқлолияти давлатии Ҷумҳурии Тоҷикистон ҳар ҳафта дар «Боғи  Ирам»-и пойтахт баргузор гардида,  то 4 сентябр идома меёбанд. То ба ҳол сокинону ҳунармандони шаҳру ноҳияҳои Ҳисор, Турсунзода, Шаҳринав, Тоҷикобод ва муассисаҳои таълимии Вазорати фарҳанги ҷумҳурӣ  бо барномаҳои ҷолиби консертӣ ҳунарнамоӣ намуданд.
Интизор меравад, ки ҳафтаи оянда ҳунармандони яке аз ноҳияҳои  дурдасти кишвар- ноҳияи Лахш дастовардҳои фарҳангию ҳунарии худро дар «Боғи Ирам» ба намоиш гузоранд.