Дар бунёди иншоотҳои ҷашнии Роғун зиёда аз 300 нафар сокинони маҳаллӣ бо ҷои кор таъмин гардидаанд

Роғун, 26.07.2016. /АМИТ «Ховар»/. «Таъмиру таҷдиди роҳи 11- километрае, ки маркази шаҳри Роғунро ба шоҳроҳи «Душанбе-Лахш» пайваст мекунад, моҳҳои наздик оғоз мегардад». Ин нуқта зимни нишасти матбуотии шаҳри Роғун таъкид гардид. Ба маълумоти роҳбарияти шаҳр, ин роҳ аз даврони шӯравӣ то имрӯз таъмир нагардидааст ва ба ронандаҳо душворӣ ва мушкилотро пеш овардааст.
Ба иттилои роҳбарияти шаҳри Роғун, бо мақсади дар сатҳи баланд пешвоз гирифтани ҷашни 25-солагии Истиқлолияти давлатии Ҷумҳурии Тоҷикистон сохтмони 9 иншооти ҷашнӣ, аз қабили таъмиру васеъ намудани 1,5 км роҳи маркази шаҳр, бинои маъмурии баландошёна, дарвозаи шаҳр, бунгоҳи тиббӣ, 2 адад майдончаҳои варзишӣ ва боғи фарҳангии шаҳр идома дорад, ки дар сохтмони онҳо зиёда аз 300 нафар сокинони маҳаллӣ бо ҷои кор таъмин гардидаанд.