Равшан Тӯйчизода: «Ба мавсими зимистон омодагии ҷиддӣ дида истодаем»

Душанбе, 14.07.2016. /АМИТ «Ховар»/. «4700 метри мураббаъ боми хонаҳои истиқоматӣ дар кишвар аз ҷониби муассисаю идораҳои тобеи Корхонаи воҳиди давлатии /КВД/ «Хоҷагии манзилию коммуналӣ» дар ин давра аз таъмир бароварда шудааст»,-мегӯяд Равшан Тӯйчизода, муовини аввали директори  КВД «Хоҷагии манзилию коммуналӣ».
Мавсуф,  14 июл дар ҷамъи хабарнигорон дар Душанбе афзуд, ки бо мақсади иҷрои қарори Ҳукумати Ҷумҳурии Тоҷикистон «Дар бораи саривақт омода намудани соҳаҳои иқтисодиёт  ва иҷтимоиёти ҷумҳурӣ барои фаъолияти мунтазам ва самарабахш дар давраи  тирамоҳу зимистони солҳои 2016-2017» 1240 метр қубурҳои оби нӯшокӣ, 9,9 ҳазор метр роҳу роҳравҳо, 13,9 ҳазор километр хатҳои барқ таъмир гардида, беш аз 40 таҳхонаҳои биноҳо аз об тоза карда шудаанд.
Инчунин зиёда аз 12 тонна маводи сӯзишвории моеъ, беш аз  40 тонна  ангишт,  2730 метри мураббаъ ҳезум,  ҳудуди 2600 метри мураббаъ маводи зиддилағжиш, аз ҷумла қум ва намак, ҳамзамон беш аз 15 тонна хлори хокка барои безараргардонии оби нушокӣ захира гардидаанд.
Равшан Туйчизода таъкид кард, ки мутахассисони КВД «Хоҷагии манзилию коммуналӣ», дар  ин давра  80 адад насосҳои обкашӣ, 81 адад таҷҳизоти барқии муҳофизати заминӣ, 34 адад трансформаторҳоро таъмир ва 40 км хатҳои канализатсияро тоза намудаанд.