Тарбияи насли наврас дар руҳияи солимии тану ақл

Деваштич, 14.07.2016. /АМИТ «Ховар»/. ТҶҶ «Созандагони Ватан» дар ноҳияи Деваштич баҳри ба наврасон талқин намудани пешбурди тарзи ҳаёти солим, дар истироҳатгоҳи «Чашма»-и ноҳия дар ҳамкорӣ бо Бахши ҷавонон, варзиш ва сайёҳӣ ва муассисаи таҳсилоти иловагӣ бозиҳои серҳаракати «Офарин»-ро баргузор намуданд.
Тавре аз Кумитаи иҷроияи Ҳизби халқии демократии Тоҷикистон дар ноҳияи Деваштич хабар доданд, дар истироҳатгоҳ, ки тамоми шароитҳои мувофиқу мусоид барои ҳам машғулияту ҳам истироҳат ва ҳам сайру гашт омода гардида буданд, наврасону ҷавонон дар иҷрои тамоми шартҳои бозиҳо чусту чолок ва фаъол буданд.
Бозиҳои серҳаракати «Офарин» дар се давр баргузор гардида, аз шартҳое иборат буданд, ки барои обу тоби бадан таъсири мусбӣ дошта, шавқи истифодаи ҳаррӯзаи чунин машғулиятҳои варзиширо дар наврасон бедор менамуд.
Инчунин тамошобинони ин бозиҳо низ аз иҷрои шартҳо ба завқ омада, шартҳоро ҳам тамошо ва ҳам баробари дастаҳои иштирокчӣ иҷро мекарданд. Бахусус дастаҳои «Далерон» ва «Ориён» маҳорати баланди чобукиро аз худ зоҳир намуда, миёни дигар дастаҳои ҳамсолони худ ғолибиятро ба даст оварданд.
Дар хотимаи чорабинӣ намояндагони Кумитаи иҷроияи ҲХДТ дар вилояти Суғд, ТҶҶ «Созандагони Ватан» ва Бахши ҷавонон, варзиш ва сайёҳӣ аз чобукию варзишдӯстии наврасон ибрози қаноатмандӣ ва хушнудӣ намуда, туҳфаҳои Кумитаи иҷроия ҲХДТ дар ноҳияи Деваштичро барои иштирокчиёни фаъол ва дастаҳои ғолиб тақдим намуданд.