Гулназар Келдӣ: «Насли ояндаро бояд чунин тарбия намоем, то роҳи оғозгардидаро бо сари баланд идома диҳад»

Душанбе, 17.08.16. /АМИТ «Ховар»/. Бахшида ба 25-солагии Истиқлолияти давлатии Ҷумҳурии Тоҷикистон  дар Агентии назорати маводи нашъаовари назди Президенти Ҷумҳурии Тоҷикистон вохӯрӣ бо Шоири халқии Тоҷикистон Гулназар Келдӣ ва Нависандаи халқии Тоҷикистон Кароматулло Мирзо баргузор гардид.
Тавре ба АМИТ «Ховар» аз маркази матбуоти агентии мазкур хабар доданд, вохӯрӣ дар байни афсарон ва хизматчиёни агентӣ, ки аксарашон кормандони ҷавони насли истиқлол мебошанд, дар рӯҳияи истиқлолдӯстию ватанпарварӣ доир гардид.
Г. Келдӣ таъкид намуд, ки яке аз вазифаҳои аввалиндараҷаи адабиёт тарбияи маънавии инсон, тарғиби ахлоқи ҳамида, ватандӯстӣ, гиромидошти арзишҳои миллӣ, ситоиши ҳамдиливу ҳамкорӣ, суботу осоиш, ба роҳи рост ва муҳити солими маънавӣ ҳидоят намудани инсон мебошад. Адабиёту фарҳанг хусусият ва сиришти инсонгароёна дошта, ба кас неруву шодмонӣ, хушиву хушбахтӣ мебахшанд.
Шоирони бузурги мо, ба мисли Рӯдакӣ, Фирдавсӣ, Ҳофиз, Саъдӣ ва Ҷ. Балхӣ ҳамеша дар ашъори худ аз дӯстию ҳамгироӣ, ваҳдату иттиҳоди инсонҳо сухан мекарданд.
«25 сол мешавад, ки насли ҷавони миллат аз шаҳди истиқлолият баҳра  мебарад ва мо бояд насли ояндаро чунин тарбия намоем, то роҳи оғозгардидаро бо сари  баланд идома дода, Ватанро ободу шукуфон гардонад. Кормандони агентӣ бо он мефахранд, ки имрӯз бо шарофати сулҳу якдигарфаҳмӣ ва фазои ороми кишвар фаъолияти пурсамар менамоянд»,- афзуд ӯ ва илова намуд, ки маҳз кормандони мақомоти ҳифзи ҳуқуқ, қудратию низомӣ, аз ҷумла агентии мазкур дар нигоҳдорӣ ва ҳифзи дастовардҳои истиқлолият, таъмини амнияту бехатарӣ, сулҳу суботи ҷомеа масъул мебошанд.
Дар вохӯрӣ шоирон дар васфи Ватан- модар, истиқлолият,  сулҳу ваҳдат шеърҳо қироат намуданд.