Маркази миллии қонунгузорӣ дар самти ташаккули маърифати ҳуқуқии шаҳрвандон корҳои назаррасро анҷом дод

Душанбе, 04.08.2016. /АМИТ «Ховар»/. «Кормандону мутахассисони Маркази миллии қонунгузории назди Президенти Ҷумҳурии Тоҷикистон  бо мақсади баланд бардоштани маърифати ҳуқуқии шаҳрвандон бо табақаҳои гуногуни ҷомеа пайваста вохӯриҳо гузаронида, дар ин самт тавассути воситаҳои ахбори омма беш аз 200 маротиба баромад намуданд». Ин матлабро Маҳмад Раҳимзода, директори Маркази миллии қонунгузории назди Президенти  Ҷумҳурии Тоҷикистон зимни натиҷагирӣ аз фаъолияти нимсолаи Марказ иброз дошт.
Мавсуф зикр кард, ки кормандони Марказ дар ин давра дар мавзӯъҳои  «Асосҳои ҳуқуқии ташаккули фондҳои кафолатӣ дар Тоҷикистон», «Фазои мусоид барои ташкилоти ғайридавлатӣ дар Тоҷикистон», «Танзими ҳуқуқии фаъолияти корхонаҳои давлатӣ мувоффиқи қонунгузории Ҷумҳурии Тоҷикистон», «Таҳлили муқоисавӣ- ҳуқуқии қонунгузории Ҷумҳурии Тоҷикистон дар соҳаи мудофиа бо қонунгузории давлатҳои аъзои ИДМ» ва «Таҳлили муқоисавӣ-ҳуқуқии қонунгузории соҳаи маорифи Ҷумҳурии Тоҷикистон бо қонунгузории маорифи давлатҳои ИДМ» таҳлили илмӣ-амалиро ба анҷом расониданд.
Ҳамзамон дар ин давра ду шумораи маҷаллаи Маркази миллии қонунгузории назди Президенти Ҷумҳурии Тоҷикистон «Қонунгузорӣ» нашр гардид.