Дар Истанбул 25-солагии Истиқлолияти давлатии Ҷумҳурии Тоҷикистонро таҷлил карданд

Душанбе, 30.09.2016. /АМИТ «Ховар»/. Бахшида ба 25-умин солгарди Истиқлолияти давлатии Ҷумҳурии Тоҷикистон Консулгарии генералии Ҷумҳурии Тоҷикистон дар шаҳри Истанбул 29 сентябри соли 2016 дар меҳмонхонаи «Crovne Рlaza Istanbul», воқеъ дар яке аз гӯшаҳои зебоманзари назди гулӯгоҳи «Босфор» зиёфати расмӣ баргузор намуд.
Дар маросими идона Волии шаҳри Истанбул — Васип Шаҳин, Сафири Фавқулода ва Мухтори Ҷумҳурии Тоҷикистон дар Ҷумҳурии Туркия М. Раҷабиён, намояндагони расмии ҳокимияти маҳаллӣ ва корпуси дипломатии муқими шаҳри Истанбул, арбобони илму фарҳанг ва хабарнигорон, инчунин шаҳрвандони Ҷумҳурии Тоҷикистон, ки дар ҳавзаи консулӣ таҳсил ва фаъолият мекунанд, иштирок намуданд.
Консули генералии Ҷумҳурии Тоҷикистон дар шаҳри Истанбул Илҳом Абдураҳмонов меҳмонон ва ҳамватанонро ба муносибати 25-умин солгарди Истиқлолияти давлатии Ҷумҳурии Тоҷикистон табрик намуд. Инчунин дар чорабинии идона Волии шаҳри Истанбул — Васип Шаҳин суханронӣ намуда, иштирокчиёнро бо ин ҷашни миллӣ табрик гуфт.
Ба диққати меҳмонон филми мустанад доир ба дастовардҳои Ҷумҳурии Тоҷикистон дар давраи Истиқлолият, намоишгоҳи хурди намунаи асарҳои косибӣ, ҳунарҳои мардумӣ, либосҳо ва зардӯзиҳои миллӣ, сӯзаниҳо, китобҳо оид ба фарҳанги мардуми Тоҷикистон ва маводи таблиғотӣ барои ҷалби сайёҳон пешкаш гардиданд.