Тоҷикистону Русия барои рушди шарикии стратегӣ аз тамоми имконот истифода менамоянд

Душанбе, 14.10.2016/АМИТ «Ховар»/. «Байни Тоҷикистону Русия муносиботи анъанавии эътимод ба якдигар вуҷуд дошта, Тоҷикистон ба сатҳи ҳамкории байнидавлатӣ ва байнипарлумонӣ бо Русия баҳои баланд медиҳад. Дар оянда низ аз тамоми имконот барои рушди шарикии стратегӣ ва муттаҳидии ду кишвар истифода хоҳад шуд». Ин нукта дар мулоқоти Маҳмадсаид Убайдуллоев, Раиси Маҷлиси миллии Маҷлиси Олии Ҷумҳурии Тоҷикистон бо Валентина Матвиенко, Раиси Шӯрои Федератсияи Маҷлиси Федералии Федератсияи Русия таъкид шуд.
Зикр шуд, ки Тоҷикистону Русия, ки шарикони стратегӣ мебошанд, ҳамкории дуҷонибаро дар доираи созмонҳои байналмилалӣ ва минтақавӣ, ҳамчунин вобаста ба масъалаҳои муҳими байналмилалӣ дар бештари мавридҳо мавқеи муштарак ва ё бо ҳам наздик доранд.
Таъкид шуд, ки ҳамкории дуҷонибаи Тоҷикистону Русия дар доираи принсипҳои боварӣ, ҳамдигарфаҳмӣ ва равобити расмӣ асос ёфтаанд. Дар масъалаи таҳкими муносиботи шарикӣ, муттаҳидӣ ва густариши равобити дуҷониба нақши асосиро сарони ду кишвар-Эмомалӣ Раҳмон ва Владмири Путин мебозанд. Ба ин дар бештари мавридҳо гуфтугӯи мунтазами сиёсӣ дар сатҳи олӣ мусоидат мекунад. Шаҳодати ин гуфтаҳо сафарҳои муштарак ва мулоқоти мунтазами намояндагони баландмақоми ду кишвар дар майдонҳои гуногуни байналмилалӣ мебошанд.
Ба роҳ мондани ҳамкорӣ дар сатҳҳои парлумон ва ҳукумат ҳам дар шакли дуҷониба ва ҳам дар шакли бисёрҷониба ба ҳукми анъана даромадааст. Ин бештар ба тақвияти ҳарчи бештари ҳамкории ду кишвар дар арсаҳои гуногун мусоидат кардааст.
Дар мулоқот мусоҳибон ҳамзамон доир ба масъалаҳои таҳкими ҳамкории иқтисодӣ, кишоварзӣ, илм, маориф, фарҳанг, муҳоҷирати меҳнатӣ ва авзои минтақа табодули назар карданд.