«Гашта- гашта аз сафар боз омадам…». Бозгашти Нуриддин Давронов ба «Истиқлол»

ДУШАНБЕ, 09.02.2017/АМИТ «Ховар»/. Капитани дастаи мунтахаби Тоҷикистон ва «Истиқлол»-и Душанбе Нуриддин Давронов, ки тобистони соли гузашта ба тими «Дунав»-и Булғория гузашта буд, аз нав ба ҳайати чемпиони мамлакат- «Истиқлол» пайваст. Дар ин бора сомонаи КФ «Истиқлол» хабар медиҳад.
Роҳбарияти «Истиқлол» ва КФ «Дунав» шартномаро ҷиҳати ба «Истиқлол» гузаштани Нуриддин Давронов ба таври иҷора то поёни моҳи июл ва эҳтимолан тамдиди он то анҷоми мавсими футболи соли 2017-и мамлакат ба имзо расониданд.
Нуриддин Давронов чун солҳои гузашта дар «Истиқлол» таҳти шумораи 8 ҳунарнамоӣ мекунад.
«Ман шодам, ки боз худро дар иҳотаи ҳамдастаҳоям мебинам. Кӯшиш мекунам, то даста ба ҳадафҳои худ бирасад. Аз ҳама асосӣ-ин иштироки бобарор дар бозиҳои Ҷоми Конфедератсияи футболи Осиё (КФО) ба ҳисоб меравад»,-гуфтааст Нуриддин Давронов.
Нуриддин Давронов аз беҳтарин бозингарони дастаи «Истиқлол» буд, ки соли гузашта бо ба имзо расонидани як шартнома ба КФ «Дунав»-и Булғория гузашт.
Мухлисони «Истиқлол» баргашти Нуриддинро хуш истиқбол гирифта, аз ӯ умеди калон доранд.