Имрӯз «Ҳосилот» ё «Шоҳин Асмоӣ» ба бозии плей-офф роҳхат мегиранд

ДУШАНБЕ, 07.02.2017/АМИТ «Ховар»/. Имрӯз дар Варзишгоҳи марказии пойтахт дастаҳои «Ҳосилот»-и Фархор ва «Шоҳин Асмоӣ»-и Афғонистон дар соати 17:00 дар бозии баргашти интихобии Ҷоми Конфедератсияи футболи Осиё (КФО) ҷиҳати соҳиб шудан ба роҳхати ягона ба бозии плей-офф вориди майдон мешаванд.
Бозии авввали ин дастаҳо, ки 31 январ дар Варзишгоҳи марказӣ сурат гирифта буд, бо ҳисоби 1:0 ба фоидаи «Ҳосилот» анҷом ёфт. Як голи задаи Иброҳим Рабимов дар дақиқаи 35-ум барои ба бозии плей-офф баромадани «Ҳосилот» кифоя аст ё не, имрӯз мухлисони футбол қазоват хоҳанд кард.
Коршиноси футболи Афғонистон Амонуллоҳ Қайсарӣ, ки ин бозиро мустақиман ба Афғонистон тавассути телевизион шарҳ медиҳад, боварӣ дорад, ки футболбозони Афғонистон дар вохӯрии баргашт бо «Ҳосилот» яке аз бозиҳои беҳтарини худро нишон медиҳанд ва барои ба даври дигар гузаштани «Ҳосилот» монеа эҷод хоҳанд кард.
Ғолиби ин бозӣ имрӯз ҳарифи навбатии худро аз бозии байни дастаҳои «Балкан»-и Туркманистон ва «Дурдой»-и Қирғизистон интихоб мекунад.