Дар Душанбе машваратҳои байнивазоратии Тоҷикистон ва Фаластин баргузор гардиданд

ДУШАНБЕ, 30.03.2017 /АМИТ «Ховар»/. 29 марти соли 2017 таҳти роҳбарии муовини якуми Вазири корҳои хориҷии Ҷумҳурии Тоҷикистон Низомиддин Зоҳидӣ ва муовини Вазири корҳои хориҷии Давлати Фаластин Мозен Шомия нахустин машваратҳои байниидоравӣ баргузор шуданд.
Тавре аз Вазорати корҳои хориҷии Тоҷикистон хабар доданд, дар машваратҳо масъалаҳои рушди муносибатҳои дуҷониба дар соҳаҳои мухталифи иқтисод, тиҷорат, фарҳанг, таҳкими ҳамкории байнипарлумонӣ, барқарор намудани робитаҳои доираҳои тиҷоратӣ ва илмӣ, инчунин таҳияи санадҳои дуҷониба ҷиҳати тавсеаи заминаи шартномавию ҳуқуқии ҳамкории Тоҷикистону Фаластин баррасӣ шуданд.
Ҳамчунин атрофи масъалаҳои мубрами минтақа ва ҷаҳон ва ҳамкории ҷонибҳо дар ҳошияи СММ, СҲИ ва МҲТБО табодули назар сурат гирифт.