29 апрел-Рӯзи байналмилалии рақс: рақс одамонро муттаҳид месозад

ДУШАНБЕ, 29.04.2017. /АМИТ «Ховар»/. 29 апрел дар тамоми ҷаҳон ҳамчун Рӯзи байналмилалии рақс таҷлил мегардад. Ин ҷашн ба ҳамаи намудҳои рақс бахшида шуда, аз соли 1982 бо қарори ЮНЕСКО таҷлил карда мешавад. Ин рӯз барои ҳунармандони соҳаи балет ва дӯсторони рақс иди дӯстдошта ба шумор меравад.
Пас аз соҳибистиқлол гардидани Ҷумҳурии Тоҷикистон Ҳукумати кишвар ба соҳаи фарҳанг таваҷҷуҳи махсус зоҳир намуд. Имрӯз балети тоҷик бо унсурҳои миллӣ ба дили бинандагон роҳ ёфтааст. Дар ин кор хизмати сарбалетмейстери Театри давлатии академии опера ва балети Тоҷикистон ба номи С. Айнӣ Мария Левитская ва ҳунармандони театр калон аст.
Мария Левитская зимни суҳбат бо хабарнигори АМИТ «Ховар» зикр намуд, ки ӯ ҳанӯз ҳангоми донишҷӯ будан ба сомонаи Президенти Ҷумҳурии Тоҷикистон мактуб навишта, хоҳиш кардааст, ки ӯро барои кор ба Душанбе даъват кунанд. Пас аз ду ҳафта ба мактуби ӯ ҷавоби мусбат меояд.
Мария Левитская мегӯяд, ки яке аз намоишҳои асосии ин мавсим балети Шӯҳрат Ашуров «Зол ва Рудоба» аз рӯи достони «Шоҳнома»-и Фирдавсӣ мебошад. «Бо Шӯҳрат Ашуров мо як кори бузургеро анҷом додем, яъне тавонистем эҷоди балети миллиро дар мамлакат аз нав эҳё намоем. Ин барои мо корнамоии бузург аст. Ин намоиш аз ду соат рақси муттасил иборат мебошад»,-иброз дошт сарбалейтместер.

Имрӯз тамошобини тоҷик имкон пайдо кардааст, ки аз рӯи хоҳиши худ намоишро интихоб ва тамошо намояд.
«Дар асари «Зол ва Рудоба» мо тавонистем ду сабки рақси миллӣ ва классикиро омезиш диҳем. Табъи тамошобинон пас аз тамошои он болида мегардад. Сабаби асосии ин ҳол дар он аст, ки ин намоиш чун бештари намоишҳо ба таври фоҷиавӣ анҷом наёфта, баръакс бо тӯю сур ва ишқу умед ба итмом мерасад.
Имрӯз Мария Левитская ва дигар ҳунармандон тавонистанд, ки намоишҳои миллиро аз нав эҳё намоянд. Ба андешаи мусоҳиб, тавассути ба саҳна гузоштани асарҳои миллӣ ҳунармандон бояд ба тамошобинон таърихи бузурги тоҷиконро омӯзонанд.