Дар ҳафтаномаи «Бадахшон»-и Афғонистон мақолаи Вазири корҳои хориҷӣ оид ба даҳсолаи нави об ба нашр расид

ДУШАНБЕ, 25.04.2017. /АМИТ «Ховар»/. Мақолаи Вазири корҳои хориҷии Ҷумҳурии Точикистон Сироҷидин Аслов таҳти унвони «Тарҳи истифодаи об дар арсаи байналмилалӣ» дар ҳафтаномаи «Бадахшон»-и Афғонистон ба нашр расонида шуд, ки ба ташаббуси нави Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба эълони Даҳсолаи «Об барои рушди устувор», солҳои 2018-2028 ва Қатъномаи Маҷмаи Умумии СММ дар ин хусус бахшида шудааст.
Тавре ба АМИТ «Ховар» аз Вазорати корҳои хориҷии Ҷумҳурии Точикистон хабар доданд, ҳафтаномаи «Бадахшон» дар вилоятҳои чоргонаи шимолу шарқи Афғонистои (Бағлон, Қундуз, Тахор ва Бадахшон) паҳн мешавад.
Тавассути чопи мақолаи мазкур аз ҷониби Консулгарии Ҷумҳурии Тоҷикистон дар Бадахшони Афғонистон дар ин нашрия, ҷавонон, равшанфикрону кормандони давлатии Афғонистон барои муаррифӣ ва шинохти ҳар чи бештари ҷанбаҳои созандаи сиёсати хориҷии Ҷумҳурии Тоҷикистон имконият пайдо намуданд.