Дар «Кохи Борбад» намоиш-фурӯши маҳсулоти ширкатҳои ватанӣ доир шуд

ДУШАНБЕ, 04.05.2017 /АМИТ «Ховар»/. Дар доираи лоиҳаи «Тамғаи писандидаи Тоҷикистон» имрӯз дар «Кохи Борбад» намоиш-фурӯши маҳсулоти ширкатҳои ватанӣ доир гардид. Намоиш — фурӯши мазкур бо ташаббуси Медиахолдинги «Оила», Палатаи савдо ва саноати Ҷумҳурии Тоҷикистон ва дастгирии Ҳукумати кишвар ташкил карда шуда, он бо мақсади тарғиби маҳсулоти хушсифати ватанӣ роҳандозӣ карда шудааст.
Муовини раиси Палатаи савдо ва саноати Ҷумҳурии Тоҷикистон Манзура Рустамова иброз дошт, ки ҳадафи асосии намоиш кумак ба ширкатҳои ватанӣ дар масъалаи дарёфт намудани мавқеи худ дар бозорҳои дохилӣ ва хориҷӣ мебошад.
«Имрӯз дар Ҷумҳурии Тоҷикистон чандин корхонаҳои дорои технологияи замонавӣ бо истеҳсоли маҳсулоти дар бозори ҷаҳонӣ рақобатпазир фаъолият намуда, Тоҷикистонро дар арсаи байналмилалӣ муаррифӣ менамоянд»,- гуфт Манзура Рустамова .
Дар намоишгоҳ маҳсулоти ширӣ ва гӯштӣ, ҳасибҳо, қаннодӣ, маҳсулоти консервшуда, шарбату нӯшокиҳо, асал, равғанҳои растанӣ, чой, намак, молҳо барои хона, таъмиру сохтмон, молҳои канселярӣ ба фурӯш бароварда шуда, ҳамчунин корхонаҳои сохтмонӣ, муассисаҳои хизматрасонӣ, марказҳои дилхушии кӯдакон ва шабакаҳои нуқтаҳои савдо маҳсулоти худро пешниҳод намуданд.
Намоиш фурӯши мазкур 3 рӯз идома ёфта, 6 май дар меҳмонхонаи «Hyatt Regency» ғолибони озмун бо ҷоизаи ифтихории «Тамғаи писандидаи Тоҷикистон» қадрдонӣ мегарданд.