Пешвои миллат назари солиму огоҳонаи ҷавононро нишонаи возеҳи ташаккулёбии мафкураи насли ояндасози мамлакат номиданд

ДУШАНБЕ, 23.05.2017 /АМИТ  «Ховар»/. Пешвои миллат дар Паёми табрикотии худ бахшида ба Рӯзи ҷавонон бо қаноатмандӣ аз назари солиму огоҳона ва диди густурдаи ҷавонон нисбат ба мафҳумҳои ҳувияти миллӣ, худшиносиву худогоҳӣ ва масъалаҳои ҷамъиятиву давлатӣ ифтихор намуда, онро нишонаи возеҳи ташаккулёбии мафкураи соҳибватанӣ ва хештаншиносии насли ояндасози мамлакат номидаанд.

Президенти кишвар изҳор доштанд, ки дар раванди давлатсозӣ ҷавонони мо дуруст дарк кардаанд, ки ширкати фаъолона ва саҳмашон дар марҳалаи кунунии ободсозии ватан, пеш аз ҳама, ба манфиати худи онҳо мебошад, зеро фардо худашон дар ҳамин сарзамин зиндагӣ карда, масъулияти идораи давлат ва рушди онро ба зиммаи хеш мегиранд.

Бино ба андешаи Пешвои миллат, ҷавонони даврони истиқлолият таҳаввулоту равандҳои ҷаҳони муосирро дуруст дарку таҳлил менамоянд ва барои омӯзиши илму донишҳои замонавӣ, техникаву технологияҳои иттилоотиву коммуникатсионӣ ва забонҳои хориҷӣ пайваста азму талош мекунанд.