Шамсиддин Орумбекзода: «Ҳунармандони тоҷик муаррифгари либоси миллӣ мебошанд»

ДУШАНБЕ, 21.07.2017 /АМИТ «Ховар»/. Имрӯз зимни баргузории нишасти матбуотии Вазорати фарҳанги Ҷумҳурии Тоҷикистон роҳбарияти он дар мавзӯъҳои гуногун, аз ҷумла  дар самти риояи қоидаҳои забони тоҷикӣ дар кино ва тарҷумаҳои он, фарҳанги номгузории тоҷик, вазъи имрӯзаи театр ва тарғиби либоспӯшии миллӣ посухҳои мушаххас дод.

Аз ҷумла дар мавриди ба бар кардани либоси бегона Вазири фарҳанг Шамсиддин Орумбекзода иброз намуд:  «Мо бояд арзишҳои миллиамонро пос дорем ва либоси бегонаро тарғиб накунем. Омилҳои зиёде мавҷуд аст, ки ба тарзи фарҳанги либоспӯшии бегона таъсир мегузорад. Яке аз ин омилҳо тақлиди кӯр-кӯрона ба либоспӯшии бегона ва омили дигар ин корҳои ҳадафманд барои  тафаккури мардумро вайрон кардан, ки ин аз ҷониби неруҳои бегона роҳандозӣ мегарданд».

Ҳамчунин зикр шуд, ки фарҳанги либоспӯшии миллӣ дар мадди назари аввали роҳбарият ва кормандони соҳаи фарҳанг қарор дорад.

«Мо кӯшиш мекунем, ки тамоми ҳунармандони мо рӯи саҳна чӣ дар дохил ва чӣ дар хориҷи кишвар муаррифкунандаи санъати воло ва либоси зебои  миллии тоҷикона бошанд. Вазорати фарҳанг бо баргузории чорабиниҳои фарҳангӣ ба аҳли ҷомеа мерасонад, ки аз фарҳанги либоспӯшии бегона худдорӣ намоянд ва ба анъанаву урфу одатҳои бегона пайравӣ накунанд»,-таъкид намуд Вазири фарҳанг.

Ёдрас мешавем, ки Пешвои миллат дар мулоқот бо фаъолон ва аҳли ҷамоатчигии кишвар ба муносибати 10-солагии қабули Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» дар мавриди пӯшидани либоси бегона чунин таъкид намуда буданд: «Моро зарур аст, ки ба зуҳуроти нангини бегонапарастӣ ҳарчи зудтар хотима бахшида, сару либосҳои миллии духтарону бонувонро бештар тарғиб намоем, пеши роҳи тақлиду таассуб ва зоҳирпарастиро гирем ва дар миёни занону бонувон корҳои фаҳмондадиҳиро вусъат бахшем».