Ҷоми Тоҷикистон оид ба футбол-2018: дастаҳои «Истиқлол» ва «Душанбе-83» дар бозии ½-ниҳоӣ бо ҳам рақобат мекунанд

ДУШАНБЕ, 11.09.2018 /АМИТ «Ховар»/. Дар рақобатҳои Ҷоми Тоҷикистон оид ба футбол чемпиони Тоҷикистон- «Истиқлол»-и Душанбе бо  дастаи «Душанбе-83»-и пойтахти кишварамон, ки дар Лигаи якум ҳунарнамоӣ дорад, дар бозии ½-ниҳоӣ бо ҳам  рақобат мекунанд.

Дар бозиҳои баргашти ¼- ниҳоӣ «Локомотив-Помир»-и Душанбе бо «Истиқлол» вохӯрда, бо натиҷаи 0:6 мағлуб гардид. Бозии аввали ин дастаҳо ҷолибтар буд ва дар он вохӯрӣ «Истиқлол» бо нишондоди 4:3  ғалаба карда буд. Аммо дар бозии дуввум дастаи мунтахаби наврасони мамлакат дар симои «Локомотив-Помир» ба чемпион муқобилияти арзанда карда натавонистанд.

Дар бозии дигари даври ¼-ниҳоӣ «Душанбе-83» бар «Файзканд»-и Хатлон бо ҳисоби 1:0 пирӯз гардид ва аз натиҷаи ду вохӯрӣ (1:0, бозии якум) ба бозиҳои ½-ниҳоӣ роҳхат гирифт.

Бозии дигари ¼-ниҳоии Ҷоми Тоҷикистон бо ширкати дастаҳои «Хуҷанд» ва «Барқчӣ» 16 сентябр дар варзишгоҳи «20-солагии Истиқлолияти Тоҷикистон»  баргузор хоҳад шуд.

Ҷоми Тоҷикистон

¼-финал

«Локомотив-Помир» – «Истиқлол» – 0:6

Голҳо: Ҷаҳонгир Абдумуминов, 19 (0:1). Фатҳулло Фатҳуллоев, 28 (0:2). Сиёвуш Асроров, 49 (0:3).  Комрон Турсунов, 62 (0:4). Дилшод Восиев, 69 (0:5). Дилшод Восиев, 90 (0:6).

Пеналтиро ба нишон нарасонд: Амирбек Ҷурабоев («Истиқлол»), 34 – дарвозабон.

Огоҳӣ гирифтанд: Сиёвуш Асроров, Дилшод Восиев («Истиқлол»).

«Душанбе-83» – «Файзканд» – 1:0

Гол: Элчибек Рашидбеков, 59.

Огоҳӣ гирифтанд: Бенҷамин Асамоа, Иззатулло Рӯзиев, Бобури Абдулаҳатзода, Дилшод Расулов, Коленс Адухеней («Душанбе-83»), Валиҷон Ҳотамов, Анушервон Наврӯзов («Файзканд»).

Аз майдон ронда шуд: Авуку Калеб («Душанбе-83»), 84 – корти дуюми зард.