Шаҳбоз Неъматуллоев чемпиони ҷаҳон оид ба бокс миёни донишҷӯён гардид!

ДУШАНБЕ, 7.09.2018 /АМИТ «Ховар»/. Дирӯз варзишгари маъруфи тоҷик Шаҳбоз Неъматуллоев   дар Чемпионати ҷаҳон оид ба бокс миёни донишҷӯён, ки дар Россия баргузор шуд, Ҷумҳурии Тоҷикистонро намояндагӣ кард.

Бояд зикр намуд, ки варзишгари тоҷик  дар даври ниҳоии Чемпионат дар вазни то 81 кг бо боксчии Россия Муҳаммадрасул Сулаймонов вориди рақобат шуд.

Дар даври аввали рақобат муштзани тоҷик нисбат ба рақиб  бартарӣ нишон дод. Дар даври дуюм варзишгари тоҷик ин бартариро пурра   ба ихтиёри худ гирифт ва муштзани Россия ба он тоб оварда натавонист.

Ҳамин тариқ, Шаҳбоз Неъматуллоев пирӯз шуда, унвони чемпиони ҷаҳонро миёни донишҷӯён соҳиб гардид.

Ёдовар мешавем, ки Шаҳбоз Неъматуллоев аввалин муштзан аз Тоҷикистон мебошад, ки ба чунин натиҷа соҳиб мешавад.