Теннисбоздухтарони тоҷик дар Малайзия соҳиби ду медал гардиданд

ДУШАНБЕ,29.11.2018 /АМИТ «Ховар»/. Ҷавондухтарони  теннисбози тоҷик  Ёсуман Салимова ва Диана Иванихина дар мусобиқаи байналмилалӣ дар Малайзия сазовори медал гардиданд.

Тавре  корманди Федератсияи  тенниси  Тоҷикистон Далер Қурбонов ба мухбири АМИТ «Ховар» хабар дод, дар ин мусобиқа Ёсуман Салимова миёни иштирокчиёни то 10-сола ба финал роҳ ёфт, вале аз теннисбози мизбон мағлуб шуда, соҳиби медали нуқра шуд.

Диана Иванихина миёни иштирокчиёни то 15-сола медали биринҷӣ ба даст овард. Ӯ дар даври нимфинал аз теннисбози Чин мағлуб шуд.

Айни замон дастаи мунтахаби ҷавонони Тоҷикистон оид ба теннис бо роҳбарии сармураббӣ Абдурасул Муҳиддинов дар Малайзия қарор дорад. Даста ба ҷамъомадҳои машқию таълимӣ фаро гирифта шуда, дар якчанд мусобиқаи байналмилалӣ иштирок мекунад. Варзишгарони мо сазовори хол гардида, ба раддабандии ҷаҳонӣ, ки солҳо боз номи варзишгарони тоҷик дар он нест, ворид мешаванд.

Ёдовар мешавем, ки дастаи мунтахаби  Тоҷикистон  дар ҳайати Аҳмад Алмовов, Ёсуман Салимова, Диана Иванихина, Хушбахт Каримов, Исамҷон Шарифов ва Аминҷон Абдуллоев 29-30 ноябр дар мусобиқаи дигари байналмилалӣ дар Малайзия ширкат мекунад.