Дар вилояти Суғд боз 10 гектар ангурзори нав бунёд мегардад

Декабрь 20, 2018 09:52

ХУҶАНД, 20.12.2018 /АМИТ «Ховар»/. Давоми соли 2019 дар вилояти Суғд дар майдони зиёда аз 10 га тариқи истифода аз усул ва таҷрибаи токпарварони шаҳри Турсунзода боғҳои нави ангур бунёд мешаванд. Ин гуна боғҳо дар ноҳияҳои иқлимашон мусоиди вилоят роҳандозӣ мегарданд.

Тавре ба хабарнигори АМИТ «Ховар» мудири шуъбаи истеҳсолии Сарраёсати кишоварзии вилояти Суғд Абдуазиз Маҳмудзода иттилоъ дод, дар ин замина  чанде пеш як гурӯҳ мутахассисони соҳаи кишоварзии якчанд ноҳияҳои вилоят ба шаҳри Турсунзода баҳри омӯзиши таҷрибаи пешқадами токпарварони хоҷагиҳои деҳқонии «Ватан» ва «Ҳоҷӣ Неъмат» сафари корӣ доштанд. Ҳамзамон токпарвари номдор ва  деҳқони асил Неъмат Усмонов давоми чанд рӯз бо даъвати роҳбарияти вилояти Суғд аз чанд хоҷагии деҳқонии токпарварии шаҳру ноҳияҳои Ашту Б.Ғафуров, Исфараву Конибодом, Спитамену Ҷ.Расулов дидан намуда, бо мутахассисони соҳа суҳбатҳои муфид анҷом дод.

Зимни суҳбат оид ба ҳамкории мутақобила шартнома ба имзо расонида шуд. Иқдом гирифта шуд, ки соли оянда ба таври таҷрибавӣ дар майдони 10 га, аз ҷумла  дар муассисаи давлатии Боғи миллии Ваҳдат ва ду хоҷагии деҳқонии Ҷамоати деҳоти Исмоили ноҳияи Б.Ғафуров барои парвариши навъҳои машҳури ангури токпарварони Турсунзода, чун «победа» ва «ҳусайнии сафеду сиёҳ» токзори нав бунёд карда шавад.

Бояд гуфт, ки имрӯзҳо аз ҷониби соҳибкорони вилоят, ки бо кишоварзони берун аз кишвар, аз ҷумла ҷумҳуриҳои Ӯзбекистон, Беларус, Чехия ва Полша шартномаҳои ҳамкории судманд доранд, баҳри рушди соҳаи кишоварзии мамлакат ва вилоят навъҳои гуногун ва серҳосили ниҳолҳои қадпасти ток оварда шуда, бо тарзу усули тавсияшуда боғҳои интенсивӣ ташкил гардида истодаанд.

Имрӯзҳо бунёди чунин намуд боғҳо дар мисоли парвариши ниҳолҳои гуногуни себ дар шаҳру ноҳияҳои Шаҳристон, Кӯҳистони Мастчоҳ, Айнӣ, Спитамен, Б.Ғафуров, Исфара, Конибодом ва Панҷакент  хуб ба роҳ монда шудааст. Тибқи нақшабандӣ, масоҳати умумии онҳо аз 3 то 9 гектарро дар бар хоҳад гирифт.

Ёдовар мешавем, ки дар вилояти Суғд дар доираи «Барномаи рушди соҳаи боғу токпарварӣ барои солҳои 2016-2020» соли 2018 бунёди 252 гектар боғу токзори нав ба нақша гирифта шудааст. То ин давра 794 гектар боғу токзори нав бунёд гардидааст, ки аз нақшаи дурнамо 3,1 баробар зиёд мебошад. Аз ин миқдор майдони боғоти нав 736 гектар ва токзори нав 58 гектарро ташкил медиҳанд.

Ҳамчунин давоми 11 моҳи соли 2018 аз вилоят ба берун аз кишвар 392 тонна (соли 2017 — 212 тонна) ангур ба маблағи 62 ҳазор доллар содирот карда шудааст.

Декабрь 20, 2018 09:52

Хабарҳои дигари ин бахш

Қитъаи муҳими роҳи Душанбе – Хоруғ – Қалъаихумб бо пулу нақб мавриди истифода қарор гирифт
Эмомалӣ Раҳмон: «Ба рушди Вилояти Мухтори Кӯҳистони Бадахшон зиёда аз 25 миллиард сомонӣ равона шудааст»
Дар Хадамоти гумрук моҳияти қонунҳои миллӣ тавзеҳ дода шуд
Эмомалӣ Раҳмон: «Дар Вилояти Мухтори Кӯҳистони Бадахшон амалисозии 9 барномаи рушди иҷтимоиву иқтисодӣ идома дорад»
Байни вилоятҳои Хатлони Тоҷикистон ва Ленингради Русия Созишномаи ҳамкорӣ ба имзо расид
Раҳмон Исломиддин дар ҷаласаи навбатии Шурои байнидавлатӣ оид ба стандартизатсия, метрология ва сертификатсияи давлатҳои аъзои ИДМ иштирок намуд
Дар Турсунзода Фестивали саводнокии молиявӣ баргузор шуд
Татбиқи тарҳи «CASA-1000» намунаи ҳамкории энергетики минтақавӣ мебошад
Ҷаласаи сеюми Комиссияи байниҳукуматии Тоҷикистону Ҷопон баргузор гардид
Байни «Амонатбонк» ва Федератсияи футболи Тоҷикистон шартномаи ҳамкорӣ ба имзо расид
Дар доираи ҳамкории Тоҷикистон бо Фонди байналмилалии рушди кишоварзӣ академияи бонкӣ таъсис дода мешавад
Харитаи роҳи Ҳадафи 7-уми Рушди Устувор барои Тоҷикистон расман оғоз гардид