Кометаи 46Р/Виртанен бори аввал ба Замин наздик мешавад. Онро астрономҳои тоҷик низ мушоҳида доранд
ДУШАНБЕ, 13.12.2018 /АМИТ «Ховар»/. Моҳи декабри соли 2018 наздикшавии кометаи 46Р/Виртанен ба Офтоб мушоҳида шуд. Кометаи 46Р/Виртанен 12 декабр дар масофаи наздиктарин аз Офтоб гузашт, ки ин ҳодисаи ғайриодӣ ба ҳисоб меравад. Ин рӯйдодро олимони тамоми ҷаҳон, аз ҷумла олимони Институти астрофизикаи Академияи илмҳои Ҷумҳурии Тоҷикистон мушоҳида доранд.
Тавре директори Институти астрофизикаи АИ Ҷумҳурии Тоҷикистон Гулчеҳра Қоҳирова ба мухбири «Ховар» иброз намуд, аз лаҳзаи кашф шудани он моҳи январи соли 1948 комета бори аввал ҳамин хел ба Замин зич наздик мешавад. 16 декабри соли равон масофа байни Замину комета ба 11.4 млн. км баробар мешавад, ки ин 30 маротиба аз масофаи байни Замин ва Моҳ зиёд аст. Ин аз рўи ченкуниҳои астрономӣ хеле наздик ба ҳисоб рафта, андозаи ҳастаи комета 1.2 км мебошад. Кометаро бо дурбин дар вақти шабона аллакай дидан мумкин аст. Комета дар бурҷи Савр, байни ситораи Алдебаран ва маҷмӯи ситоравии Плеядҳо ҷойгир мебошад ва ҳангоми ба тарафи ҷанубу шарқии осмон нигоҳ кардан онро мушоҳида кардан мумкин аст.
Бино ба маълумоти номбурда, астрономҳои тамоми ҷаҳон мушоҳидаи меҳмони кайҳониро, хусусан ҳангоми наздикшавии он бо Замин оғоз карданд. Ин гуна тадқиқот маълумотро дар бораи моддае, ки аз он ҷирмҳои Системаи офтобӣ ба вуҷуд омадаанд, таъмин месозад.
«Астрономҳои Институти астрофизикаи АИ ҶТ мушоҳидаҳои оптикии кометаи Виртаненро дар расадхонаҳои астрономии «Ҳисор» ва «Санглох» оғоз карданд. Дар қатори мушоҳидаҳои оптикии мо мониторинги радиоии комета бо ёрии радиотелескопҳои пурқуввати Голдстоун ва Аресибои ИМА гузаронида шуда истодаанд. Дар рӯйдоди мазкур астрономҳои Россия, Словакия, Чин ва дигар кишварҳо ширкат меварзанд. Кометаи Виртанен астрономҳои ҷаҳонро барои тадқиқ муттаҳид карда, оид ба омўзиши масъалаҳои пайдоиши оинот мусоидат менамояд»,-гуфт директори Институти астрофизикаи АИ Ҷумҳурии Тоҷикистон Гулчеҳра Қоҳирова
Кометаи 46Р/Виртанен, ки дар Расадхонаи астрономии «Ҳисор»-и Институти астрофизикаи АИ ҶТ 12 декабри соли 2018 аксбардорӣ шуд.
Кометаи 46Р/Виртанен, ки дар Расадхонаи астрономии «Санглох»-и Институти астрофизикаи АИ ҶТ 12 декабри соли 2018 аксбардорӣ шуд.
Соли 2024 7584 сайёҳи хориҷӣ осорхонаҳои шаҳру ноҳияҳои Тоҷикистонро тамошо кардаанд
«Дастурамали либосҳои тавсиявӣ барои духтарон ва занони Тоҷикистон» нашр ва дастрас мегардад
35-СОЛАГИИ ИСТИҚЛОЛИ ДАВЛАТӢ. Дар Мастчоҳ Қасри фарҳанг бунёд карда мешавад
Дар Донишкадаи давлатии санъати тасвирӣ ва дизайни Тоҷикистон нуктаҳои асосии Паёми Президенти Тоҷикистон тавзеҳ дода шуданд
Бо мақсади муаррифии ёдгориҳои таърихии Тоҷикистон силсилакитобҳо ба нашр мерасанд
НИШАСТИ МАТБУОТӢ. Дар Тоҷикистон 26 таҳқиқоти бостонӣ гузаронида мешавад
ЭҲЁИ ҲУНАРҲОИ МАРДУМӢ. Қолин бо нақшу нигори гуногунранг маснуоти бофандагии бадеӣ аст
«ПИРЯХ». Таҳти чунин унвон театри опера ва балети тоҷик дар шаҳрҳои Париж ва Брюссел намоиш пешниҳод мекунад
Дар шаҳри бостонии Хуҷанд ба таҷлили Иди байналмилалии Наврӯз омодагӣ мегиранд
САДА ОМАД, КИ ТУРО МУЖДА ДИҲАД АЗ НАВРӮЗ. Ин ҷашни ниёгон дар ноҳияи Нуробод пуршукуҳ таҷлил гардид
Дар Тоҷикистон зиёда аз 21 навъи маводу масолеҳи тармимгарӣ омода карда мешавад
ПАЁМЕ, КИ ҲАМА НУРУ НАВИД АСТ. Андешаҳои Шоири халқии Тоҷикистон Камол Насрулло дар ҳошияи Паёми Президенти Тоҷикистон ба Маҷлиси Олӣ
