Олими тоҷик бо Нишони сарисинагии «Барои хизматҳои шоиста дар рушди илми Ҷумҳурии Қазоқистон» сарфароз гардид

Январь 9, 2019 14:30

ДУШАНБЕ, 09.01.2019 /АМИТ «Ховар»/. Олими тоҷик, доктори илмҳои таърих, профессор, директори Институти таърих, бостоншиносӣ ва мардумшиносии  ба номи Аҳмади  Дониши  Академияи илмҳои Ҷумҳурии Тоҷикистон, узви ҳайати мушовараи АМИТ «Ховар»   Зикриё Акрамӣ бо Нишони сарисинагии «Барои хизматҳои шоиста дар рушди илми Ҷумҳурии Қазоқистон»  сазовор гардид. Нишонро дар яке аз конференсияҳои байналмилалӣ дар Қазоқистон Вазири маориф ва илми ин кишвар дар фазои тантанавӣ ба намояндаи Тоҷикистон супорид. 

Профессор Зикриё Акрамӣ аз миёни директорони институтҳои таърихи Осиёи Марказӣ нахустин роҳбарест, ки бо чунин нишон қадрдонӣ мегардад. Номбурда 166-умин нафарест, ки сазовори чунин нишон гардидааст.

Директори Институт Зикриё Акрамӣ ба хабарнигори АМИТ «Ховар» Мавҷуда Анварӣ иброз намуд, ки ин қадрдонӣ барояш ғайричашмдошт буд. Ба нақли мавсуф, соли гузашта як гурӯҳ олимони таърихшиноси Ҷумҳурии Қазоқистон якҷо бо ҳайати калони эҷодии шабакаи телевизиониии «ТВ Қазоқистон» ба Тоҷикистон омаданд. Мақсади сафарашон  таълифи силсилафилми «Тамаддуни Осиёи Марказӣ» буд.

«Ин филм таърихи тамаддуни Осиёи Марказиро аз қадим то асрҳои миёна дар бар мегирад. Маро ба ҳайси мушовири илмӣ дар таълифи ин филм даъват намуданд, то ба онҳо барои навор гирифтани он кумак расонам. Филм тақрибан аз 17 серия иборат аст. Дар таҳияи сенарияи филм низ саҳм гузоштем, яъне баъди шинос шудан бо сенария ба он таклифу пешниҳодҳо ворид карда шуданд. Дар яке аз ин серияҳо  саҳифаҳои таърихи дурахшони халқи тоҷик муаррифӣ шудаанд, ки онро банда шарҳ медиҳам»,-гуфт З. Акрамӣ.

Ин олими тоҷик дар як зумра конфронсу симпозиумҳои байналхалқӣ оид ба таърихи мардумони Осиёи Марказӣ, аз ҷумла Тоҷикистон аз қадим то имрӯз, инчунин масъалаҳои ҳифзу нигаҳдории ёдгориҳои ин давлатҳо маърӯзаҳои илмӣ намуда, таърихи мардумони онро дар миқёси байналхалқӣ муаррифӣ намудааст.

«Дар айни ҳол бо иштироки бостоншиносони тоҷику қазоқ корҳо дар самти бақайдгирии ёдгориҳои таърихию фарҳангии Роҳи абрешим ҷараён доранд.  Чандин маротиба кормандони Институт ба Қазоқистон ва олимони қазоқ ба Тоҷикистон сафар карданд. Онҳо он ёдгориҳоеро, ки дар Роҳи абрешим ҷойгиранд, пайваст намуда, таърихи муштараки  ин халқҳоро навишта истодаанд. Инчунин дар самти омӯзиши таърихи этникии қазоқон дар Тоҷикистон ва тоҷикони Қазоқистон аз ҷониби олимони ҳарду давлат як зумра  корҳои илмӣ дар арафаи анҷом қарор доранд»,-гуфт директори Институт Зикриё Акрамӣ.

Январь 9, 2019 14:30

Хабарҳои дигари ин бахш

Дар Душанбе робитаҳои фарҳангии Тоҷикистон ва Эрон баррасӣ шуданд
Дар Душанбе Пажуҳишгоҳи фарҳангии тоҷикӣ-форсӣ ифтитоҳ гардид
Дар Душанбе Форуми олимону пажуҳишгарони Тоҷикистон ва Эрон баргузор шуд
Дар шаҳри Душанбе маҳфили шеъру адаби Тоҷикистон ва Эрон оғоз гардид
«ШОМИ ШЕЪРИ ТОҶИКИСТОНУ ЭРОН». Таҳти ин унвон дар Китобхонаи миллӣ барномаи фарҳангӣ баргузор мешавад
Дар Душанбе Форуми олимон ва пажуҳишгарони Тоҷикистон ва Эрон баргузор мегардад
«ҶИЛОИ РАНГҲО». Таҳти ин унвон дар Тоҷикистон фестивал-намоиши либосҳои миллӣ баргузор мешавад
Омӯзиши «Шоҳнома»-и Фирдавсӣ уфуқҳои наву фарогиртареро ба рӯи хонандаи тоҷик боз мегардонад
Дар Душанбе сессияи зимистонаи Академияи хурди илмҳои Ҷумҳурии Тоҷикистон баргузор гардид
Моҳи май дар Тоҷикистон бахшида ба 115-солагии Шоири халқии Тоҷикистон Боқӣ Раҳимзода чорабиниҳои гуногун баргузор мешаванд
Дар Институти химия озмоишгоҳи маводи ба коррозия устувор бо асбобу технологияҳои муосир ифтитоҳ гардид
Дар Академияи миллии илмҳои Тоҷикистон ҳамоиши илмӣ баргузор шуд