Носир Саидов: «Телевизиони Сафина» барои дарёфти ҷавонони боистеъдод бо донишгоҳҳо ҳамкории мустақим дорад»

ДУШАНБЕ, 07.02.2019. /АМИТ «Ховар»/.  Имрӯз  зимни нишасти матбуотии  Муассисаи давлатии «Телевизиони Сафина» директори Муассисаи мазкур  Носир Саидов ба саволи мухбири АМИТ «Ховар» оид ба чӣ гуна интихоб ва тайёр намудани наттоқон дар  телевизион иброз дошт, ки «наттоқонро  барои телевизион, махсусан барои барномаҳои иттилоотӣ мо тариқи озмун қабул намуда, давоми се-чор моҳ меомӯзонем».

Инчунин зикр карда шуд, ки  «ғайр аз он ки телевизион дар як сол як маротиба озмун эълон мекунад, он ҳамчунин    бо донишгоҳҳо ва роҳбарияти факултетҳои журналистика барои дарёфти ҷавонони  боистеъдод ҳамкории мустақим дорад.  Нафароне, ки қобилияти барандагӣ,   чеҳраи зебо ва нутқи бурро дошта  бошанд,    ба кор қабул карда мешаванд. Аммо,  мутаассифона, ёфтани  наттоқе, ки ҳам дар барномаҳои иттилоотӣ барандагӣ кунаду ҳам қалами хуб дошта бошад, бисёр мушкил аст».

Зикр карда шуд, ки  «Телевизиони Сафина» бо мақсади табодули таҷриба ва ҳавасмандсозии кормандони соҳаи телевизион соли дуюм аст, ки Озмуни телевизионии «Беҳтарин»-ро роҳандозӣ мекунад. Дар озмун аз рӯи 11 номинатсия беҳтаринҳо дарёфт ва дар ин  маросим бо ҷом, диплом ва туҳфаи пулӣ қадрдонӣ мешаванд.