ҒАЛАБА МУБОРАК! «Хуҷанд» дар майдонаш дастаи «Дордой»-и Қирғизистонро мағлуб намуд

ДУШАНБЕ, 18.04.2019 /АМИТ «Ховар»/. Шоми  дирӯз дастаи футболи «Хуҷанд»-и Тоҷикистон дар рақобатҳои даври дуюми марҳилаи гурӯҳии Ҷоми КФО-2019  дар майдонаш  дастаи  футболи «Дордой»-и Қирғизистонро қабул намуд.

Тавре мухбири АМИТ «Ховар»  хабар медиҳад, ин  вохӯрии дастаҳо дар Варзишгоҳи «20-солагии Истиқлолияти Тоҷикистон» баргузор шуда, бо ҳисоби 3:1 ба нафъи дастаи  футболи  «Хуҷанд» хотима ёфт. Голи нахустини дидорро дар дақиқаи 17-ум футболбози меҳмонон Бекжан Сагинбаев ба нишон  расонид.

Дар лаҳзаҳои охири қисми аввали  рақобат футболбози шинохтаи  дастаи  «Хуҷанд» – Дилшод Восиев ба рақибон голи ҷавобӣ зада, ҳисобро мусовӣ намуд. Дар дақиқаи 63-юм Дилшод Восиев голи дуюмро ба ҳадаф расонид. Нуқтаи ниҳоиро дар ин бозӣ Ҷаҳонгир Эргашев гузошт. Ӯ дар дақиқаи 89-ум голи сеюми дастаашро аз пеналти ба нишон  расонида, пирӯзии дастаи «Хуҷанд»-ро таъмин намуд. Баъди ин бозӣ  дастаи футболи «Хуҷанд» се имтиёз ба даст оварда, ба зинаи дуюми гурӯҳи «D» роҳ ёфт.

Ёдовар мешавем, ки шогирдони Виталий Левченко дар даври сеюм бо дастаи футболи  «Алтин – Асир»-и Туркманистон рақобат мекунанд.