Дар Хуҷанд нақши технологияҳои информатсионӣ дар баланд бардоштани сифати таълимро баррасӣ карданд

ХУҶАНД, 09.04.2019. /АМИТ Ховар/. «Нақши технологияҳои информатсионӣ дар баланд бардоштани сифати таълим»- таҳти ин унвон дар Донишгоҳи давлатии ҳуқуқ, бизнес ва сиёсати Тоҷикистон, воқеъ дар шаҳри Хуҷанд конфронси ҷумҳуриявӣ доир гардид. Дар кори конфронс олимону мутахассисони соҳавӣ, намояндагони муассисаҳои таҳсилоти олии кишвар ва ташкилоту ширкатҳои бонуфуз ширкат доштанд.

Бино ба иттилои хабарнигори АМИТ Ховар, ректори донишгоҳ Муъмин Шарифзода зикр дошт, ки тараққиёти илму техникаҳои муосир водор месозад, ки ҳамаи ҷабҳаҳои фаъолият, бахусус, идоракунии раванди таълим дар  муассисаҳои таҳсилоти олӣ бо истифодаи технологияҳои иттилоотӣ,  ки  талаботи даврони муосир аст, мувофиқ гардонида шавад.  Зеро истифодаи самараноки воситаҳои муосири техникӣ дар таъмини сифати таҳсилот, воридшавии  Ҷумҳурии Тоҷикистон  ба  фазои  ягонаи  таҳсилоти  ҷаҳонӣ  ва  татбиқи  намудҳои гуногуни таҳсилот – кредитӣ ва фосилавӣ   нақши муассир дорад.

Баъдан чанд нафар олимону устодон, аз ҷумла муовини ректор оид ба таълим ва идораи сифати таҳсилоти Донишгоҳи технологии Тоҷикистон, дотсент Маҳмуд Тошматов, муовини ректор оид ба таълими ДДМИТ, дотсент Амрулло Нурализода, муовини директори ДПДТТХ ба номи М.М.Осимӣ Хуршед Мақсудов, мудири кафедраи Донишгоҳ Шоира Муҳаммедова оид ба нақши технологияҳои информатсионӣ дар самти беҳтар намудани сифати таълим сухан гуфтанд.

Кори конфронс бо пешниҳод ва баррасии беш аз  100 мақола дар чор бахш идома ёфт. Дар маърӯзаҳо перомуни  роҳҳои ташаккул ва ҳавасмандкунии  донишҷӯён дар раванди таълим тавассути технологияҳои муосир, тарзи истифодаи босамари усулҳои инноватсионӣ дар  мактабҳои олӣ,  аҳамият ва муҳимияти технологияи инноватсионӣ дар раванди таълим, коркарди  технологияи нави қобилияти касбии омӯзгори навовар, муаммоҳо ва рушди самтҳои инноватсионӣ дар системаи маориф, низоми босамари тайёр кардани мутахассисон ба воситаи технологияҳои муосир, тақвияти истифодаи технологияи иттилоотии муосир дар раванди идоракунӣ, зарурати татбиқи технологияҳои инноватсионии таълимӣ дар системаи маориф ва ғайра сухан рафт.

Дар интиҳо бо муайян намудан ва пешниҳоди омилҳои муҳими омода кардани мутахассисони баландихтисос бо истифодаи технологияҳои инноватсионӣ кори конфронс ба анҷом расид.

Зикр гардид, ки ҳадафи асосии баргузории ҳамоиши ҷумҳуриявӣ бо ҷалби намояндагон аз донишгоҳҳои бонуфузи мамлакат аз тақвияти бештари фазои таҳсилоти олии кишвар бо истифода ва татбиқи воситаҳои технологияҳои инноватсионӣ ва теллекомуникатсионӣ, касб ва мавқеи муайян доштан дар фазои таҳсилоти олии давлатҳои Аврупо иборат буд.