Дар пойгаи аспдавонӣ «Радана» ҷоизаи асосӣ-шутурро соҳиб шуда, онро ба Файзобод бурд

ДУШАНБЕ, 01.04.2019. /АМИТ «Ховар»/.  Ба ифтихори ҷашни байналмилалии Наврӯз дар Муассисаи давлатии «Наврӯзгоҳ»-и шаҳри Душанбе мусобиқаи кушоди шаҳри Душанбе оид ба аспдавонӣ барои дарёфти Ҷоми «Пойтахт-2019» анҷом ёфт.

Тавре сомонаи расмии ТВ «Варзиш» хабар медиҳад, дар он беш аз 60 сар аспҳои хуби зоти тоҷикиву англисӣ аз корхонаҳои соҳавии ҷумҳурӣ бо беҳтарин чобуксаворони кишвар иштирок карданд. Мусобиқа дар масофаҳои 1000, 1200  ва 1600 метр дар шаш марҳила гузаронида шуд.
Дар пойгаи якум ба  масофаи 1600 метр аспи хушзот бо лақаби «Звезда» бо нишондоди 1 дақиқаю 59 сония таҳти роҳбарии Раҳматшо Бегиҷонзода ғолиб омад.

Дар ҳамин масофа дар пойгаи дуюми аспҳои соли гуногуни зоти тоҷикӣ аспи  «Бомдод» дар 1 дақиқаю 49 сония мақоми аввал ба даст овард.
Дар пойгаи сеюми аспҳои соли гуногуни зоти тоҷикӣ аспе бо номи «Рекорд» соҳиби ҷои аввал гардид. Нишондоди ин асп дар  масофаи 1600 метр ба  1 дақиқаю 49 сония баробар шуд.

Ниҳоят дар пойгаи 6-уми аспҳои дусолаи зоти тоҷикӣ, ки ҷоизаи асосиаш шутур буд, бо нишондоди 1 дақиқаю 11 сония аспе бо номи  «Радана» аз хоҷагии деҳқонии «Дошмандӣ»-и ноҳияи Файзобод ғолиб ва соҳиби ҷоиза гардид.