Нашриёти «Камолак» девони Камоли Хуҷандиро ба забони ӯзбекӣ тарҷума кард

ДУШАНБЕ, 29.04.2019/АМИТ «Ховар»/. Дар шаҳри Тошканди Ҷумҳурии Ӯзбекистон нашриёти «Камолак» девони Камоли Хуҷандиро бо забони ӯзбекӣ дар тарҷумаи Олимҷон Бӯриев интишор намуд. Ин армуғонест ба шарафи 700 –солагии шоири шаҳири тоҷик Камоли Хуҷандӣ.

Тавре аз Хадамоти матбуоти вилояти Суғд ба АМИТ «Ховар» хабар доданд, девони Шайх Камол  бо ташаббуси Академияи фанҳои Ҷумҳурии Ӯзбекистон, Осорхонаи давлатии ба номи Алишер Навоӣ таҳия ва омода шудааст.  Дар мақолаи академик Азиз Қайюмов, ки дар оғози девон оварда шудаст, гуфта мешавад, ки Камоли Хуҷандӣ аз муътабартарин суханварони замонаш буда, ин маҳбубият  миёни хонандагони чаҳон рӯзафзун аст.

Ба иттилои манбаъ, Олимҷон Бӯриев шоир ва тарҷумони мумтози Ӯзбекистон буда,  то ин дам  «Хамсаҳо»-и Низомиву Деҳлавӣ, «Ҳафт авранг»-и Ҷомӣ ва девони ҳофизи Шерозиро тарҷума кардааст.