Ҷоми КФО: имрӯз «Истиқлол» ва «Дордой» дар Варзишгоҳи марказии ҷуҳуриявии Душанбе бо ҳам бозӣ мекунанд

Май 1, 2019 13:24

ДУШАНБЕ, 01.05.2019. /АМИТ «Ховар»/.  Имрӯз чемпиони Тоҷикистон– дастаи «Истиқлол»-и Душанбе   дар доираи даври сеюми бозиҳои Ҷоми КФО дар гурӯҳи «Д» бо дастаи «Дордой»-и Қирғизистон дар Варзишгоҳи марказии ҷумҳуриявии шаҳри Душанбе вориди майдон мешавад.  Шарҳи мухбири АМИТ «Ховар» Аловиддин БӮРИЕВ   дар ин бора пешкаш мегардад.

«Истиқлол» ва «Дордой» то ба имрӯз бо ҳам се бозӣ анҷом додаанд. Ҳанӯз соли 2012  як маротиба дар доираи бозиҳои нимниҳоии Ҷоми Президенти Конфедератсияи футболи Осиё «Истиқлол» дар шаҳри Душанбе  бо ҳисоби 2:0 «Дордой»-ро шикаст дод ва баъдан соли  2017 дар бозиҳои гурӯҳии Ҷоми КФО бори дигар бо ҳамин натиҷа истиқлолиҳо «Дордой»-ро ноком  карданд. Бозии ҷавобии дастаҳо дар Қирғизистон бо шикасти соҳибони майдон ва бо ҳисоби 1:4 ҷамъбаст шуд. Инак бори дигар имрӯз дастаҳо бо ҳам қувва месанҷанд.

Дар нишасти хабарӣ сармураббии дастаи «Дордой» Александр Крестинин, ки дастаи мунтахаби Қирғизистонро ба бозиҳои ниҳоии Чемпионати Осиё-2019 бароварда буд,  аз бохтҳои пешинаи даста наҳаросида, ҳадс зад, ки ин дафъа «Дордой» он дастаи пешина нест ва дар наздаш мақсади ба даври дигари бозиҳои Ҷоми КФО баромадан гузошта шудааст. “Футболбозон дигаранд ва мо ҳуқуқ надорем, ки дастаеро дар ин гурӯҳ беҳтарин шуморем. Ҳар кадоми мо вазифа гирифтаем, ки соҳиби ҷои аввал бошем”, –ҷамъбаст кард Кристинин.

Сармураббии дастаи «Истиқлол» Ҳаким Фузайлов дар бораи ин бозӣ изҳор намуд, ки «Дордой» баъди 5 имтиёзро аз даст додан дар ду бозии пешина мисли сайди тирхӯрдаест, ки бо тамоми қувва мехоҳад аз вазъият раҳо ёбад ва тамоми тадбирҳоро меандешад, ки ба ғалаба ноил шавад. Футболбозони мо инро дарк мекунанд ва танҳо барои ғолиб омадан ба майдон мебароянд. Вазъи саломатии бозингарон хуб аст. Бозии ниҳоят душвор моро интизор мебошад».

Капитани «Истиқлол» Фатҳулло Фатҳуллоев мухлисони тоҷикро барои дастгирӣ дар бозии имрӯза бо «Дордой», ки соати 19:00 оғоз меёбад, ба варзишгоҳ даъват намуд.

Ба ҳамин тартиб даври сеюми бозиҳо дар  гурӯҳи «Д»-и Ҷоми КФО имрӯз бо вохӯрии дастаҳои «Истиқлол» ва «Дордой» ба анҷом мерасад. Роҳбарияти КФ «Истиқлол» барои мухлисон низ туҳфаи худро омода карда, аз рӯи рақамҳои билети даромад бозии лотереяро ташкил намудааст, ки мухлисони толеъбаланд сазовори ноутбук, планшет ва телефони муосир хоҳанд гашт.

Биёед имрӯз якҷоя чемпиони ҳафткаратаи Тоҷикистон –дастаи «Истиқлол»-ро  дар варзишгоҳ дастгирӣ кунем.

Май 1, 2019 13:24

Хабарҳои дигари ин бахш

Федератсияи футболи Тоҷикистон бозигарони боистеъдодро интихоб менамояд
Паҳлавонони Тоҷикистон, Узбекистон ва Русия ғолиби Мусобиқаи байналмилалӣ оид ба гӯштингирӣ дар шаҳри Душанбе гардиданд
Тоҷикистон мизбони бозиҳои интихобии Ҷоми Осиё-2026 байни духтарон (U-20) интихоб шуд
РӮЗИ ҶАҲОНИИ ФУТБОЛ. Ҳафтаи ҷаҳонии футбол ба таври густарда доир мегардад
Шоҳҷоизаҳои гӯштини миллии шаҳри Роғунро паҳлавонҳо аз Тоҷикистон ва Узбекистон сазовор шуданд
ФУТБОЛ. Қуръакашии марҳилаи муқаддамотии Ҷоми Тоҷикистон-2025 баргузор шуд
ФУТБОЛ. Дастаи мунтахаби Тоҷикистон бо тими миллии Камбоҷа бозии дӯстона анҷом медиҳад
Ҷудочиёни тоҷик барои иштирок дар чемпионати Осиё ба Тайиланд сафар намуданд
Аз Тоҷикистон дар мусобиқаи «Dushanbe Grand Slam 2025» 36 варзишгар иштирок менамояд
Ҳайати паҳлавонони тоҷик барои иштирок дар Мусобиқаи байналмилалии гӯштингирӣ барои дарёфти «Ҷоми Раиси шаҳри Душанбе» муайян шуд
Варзишгарони тоҷик дар Чемпионати Осиё ва Уқёнусия оид ба самбо соҳиби 27 медал гардиданд
Шоҳҷоизаҳои гӯштини миллии шаҳри Ваҳдатро Сомон Аламов ва Ғазалшои Давлатшо сазовор шуданд