Сафиало Азизуллозода: «Дар таълиму тарбияи фарзандон набояд бетарафӣ зоҳир кард»

ДУШАНБЕ, 02.05.2019. /АМИТ «Ховар»/. Дирӯз вохӯрии сардори РВКД дар минтақа ва ноҳияи Рашт Сафиало Азизуллозода бо сокинони Ҷамоати деҳоти Боқӣ Раҳимзодаи ноҳияи Рашт оид ба пешгирии шомилшавии ҷавонон ба ҳизбу ҳаракатҳои террористию экстремистӣ баргузор гардид.

Тавре ба мухбири АМИТ «Ховар» аз Вазорати корҳои дохилӣ хабар доданд, зимни вохӯрӣ сардори РВКД дар минтақа ва ноҳияи Рашт С. Азизуллозода тариқи слайд ва пахши видео-роликҳо ба мардум сабабу омилҳои шомилшавии ҷавононро ба ҳизбу ҳаракатҳои террористию экстремистӣ шарҳ дод.

Ҳамчунин дар ҷараёни вохӯрӣ бо мардум ва имомхатибони масҷидҳо гуфта шуд, ки зимни муҳоҷирати меҳнатӣ фарзандонашонро беназорат нагузошта, пайваста бо онҳо дар тамос бошанд. Бояд ки дар таълиму тарбияи фарзандон бетарафӣ зоҳир накарда, онҳоро дар рӯҳияи ватандӯстию ахлоқи ҳамида тарбия  намоянд.

Сокинони Ҷамоати деҳоти Боқӣ Раҳимзода аз баргузории суҳбати озоду самимӣ ба роҳбарияти РВКД дар минтақа ва ноҳияи Рашт изҳори миннатдорӣ намуда, бо қаноатмандӣ аз фаъолияти имрӯзаи милитсия зикр карданд, ки чунин вохӯриҳо дар таълиму тарбияи насли ҷавон ва пешгирии ҷинояту ҷинояткорӣ таъсирбахш мебошанд.