«Самари ишқ» дар «Бухоро» ба чоп расид

ДУШАНБЕ, 24.05.2019/АМИТ «Ховар»/. «Самари ишқ», чунин ном дорад, маҷмӯаи намунаҳои  эҷоди адибони шаҳри Ҳисор, ки дар  чопхонаи «Бухоро»-и Душанбе ба тозагӣ  нашр гардида, пешкаши дӯстдорони каломи бадеъ гардонида шуд.

Маҷмӯа бо ибтикори Мақомоти иҷроияи ҳокимияти давлатии шаҳри Ҳисор ба нашр расидааст.  Мураттиби он  адиб Саидмурод Расулӣ буда,  таҳрири китобро  шоир Ворис  ба  анҷом расонидааст.

Дар китоби  «Самари ишқ» намунае аз ашъори назмию насри шоирону нависандагони баркамол ва ҷавони шаҳри Ҳисор, ки дар  васфи Ватан, Истиқлолият, худшиносии миллӣ,  сулҳу ваҳдат,  зебоиҳои нотакрори табиати биҳишосои Тоҷикистон, накӯкорӣ ва дигар фазилатҳои  неку ҳамидаи инсонӣ сурудаву эҷод кардаанд,  гирд оварда шудааст.