«Барои ҳалли мушкилоти дастрасии аҳолӣ ба оби тозаи ошомиданӣ чӣ бояд кард?». Бардошт аз конфронси илмӣ-амалӣ дар Душанбе

Июнь 25, 2019 14:00

ДУШАНБЕ, 25.06.2019. /АМИТ «Ховар»/. Зиёда аз 60 фоизи захираҳои оби минтақаи Осиёи Марказӣ дар қаламрави Ҷумҳурии Тоҷикистон мавҷуданд. Бо вуҷуди ин то ҳол дар мамлакат  мушкилоти дастрасии аҳолӣ ба оби тозаи ошомиданӣ ҷой дорад. Барои ҳалли ин масъала Ҳукумати Ҷумҳурии Тоҷикистон дар ҳамкорӣ бо шарикони рушд  барномаҳои беҳтар намудани  таъмини  аҳолии мамлакатро бо оби тозаи ошомиданӣ таҳия ва дар амал татбиқ менамояд, ки он қадами устуворест дар самти таъмини аҳолии  мамлакат бо оби тозаи ошомиданӣ. Ин матлаб имрӯз зимни баргузории конфронси илмӣ-амалии «Захираҳои обии Ҷумҳурии Тоҷикистон: нерӯ ва идоракунии стратегӣ», ки дар шаҳри Душанбе доир шуд, баён гардид.

Тавре мухбири АМИТ «Ховар» Зарангези Латиф хабар медиҳад, конфронси мазкур дар доираи эълон гардидани Даҳсолаи байналмилалии амал «Об барои рушди устувор, солҳои 2018-2028» баргузор гардида, дар кори он кормандони Маркази тадқиқоти стратегии назди Президенти Ҷумҳурии Тоҷикистон, коршиносону масъулони вазорату идораҳои дахлдор ширкат варзиданд.

Зикр гардид, ки ҳадафи аслии қабули Қатъномаи Маҷмаи умумии Созмони Милали Муттаҳид оид ба Даҳсолаи байналмилалии амал «Об барои рушди устувор», солҳои 2018-2028  ташкили ҳамкории судманди байни кишварҳо дар сатҳи байналмилалӣ барои кам кардани хатарҳои бамиёномада мебошад.  Зеро дар даҳсолаҳои охир инсоният ба таҳдидҳои муосири ҷаҳонӣ, аз ҷумла тағйирёбии иқлими сайёра  ва бар асари он зиёдшавии фалокатҳои табиӣ, обхезӣ, яхчу тармафароӣ, обшавии пиряхҳо, проблемаҳо оид ба таъминоти об бинобар зиёдшавии босуръати аҳолӣ, хурӯҷи  бемориҳои  сирояткунанда   ва  ғайра  мебошанд.

Сардори раёсати Маркази тадқиқоти стратегии назди Президенти Ҷумҳурии Тоҷикистон Даринг Раҳмон иброз дошт, ки ҳарчанд дар доираи  Ҳадафҳои Рушди Ҳазорсола доир ба ҳалли масъалаҳои об  ва ташаббусҳои  Ҷумҳурии  Тоҷикистон дар соҳаи об   пешрафтҳои назаррас  ба даст омадаанд, вале то ҳанӯз ҳам қисми зиёди аҳолии  сайёра ба оби тозаи ошомиданӣ дастрасӣ  надоранд.

«Чуноне мутахассисон пешгӯӣ менамоянд, дар сурати тағйирёбии иқлим ва дигар офатҳои табии то соли 2050 мардуми сайёра бо мушкилоти  норасоии об дучор мешаванд», -таъкид намуд номбурда.

Ба зикри мавсуф,  ҳарчанд, ки Ҷумҳурии Тоҷикистон дар саргаҳи захираҳои оби тозаи ошомиданӣ қарор дошта бошад ҳам, вале моро водор месозад, ки аз масъалаҳои глобалии танқисии оби тоза, ки  имрӯз аксари кишварҳои ҷаҳонро фаро гирифтааст, бетараф набошем.

Зимни конфронс муовини Вазири энергетика ва захираҳои оби Ҷумҳурии Тоҷикистон Шарифа Худобахш изҳор дошт, ки бо мақсади  бо оби тозаи ошомидании мутобиқ ба сифати меъёрҳои давлатӣ ҷавобгӯ таъмин намудани аҳолии мамлакат ва беҳтаргардонии солимии мардум «Барномаи беҳтар намудани таъминоти аҳолии Ҷумҳурии Тоҷикистон бо оби тозаи нӯшокӣ барои солҳои 2008-2020» қабул гардид, ки амалӣ намудани он яке аз ҳадафҳои асосии давлат ба ҳисоб меравад.

Ба зикри номбурда, имрӯз дар соҳаи оби ҷумҳурӣ зиёда аз 28 лоиҳа бо маблағи умумии 352 миллион доллари амрикоӣ татбиқ мегарданд.

«Бо мақсади ҷорӣ намудани механизми пешқадами институтсиалӣ, ҳуқуқӣ оид ба идоракунии захираҳои об ба таҷдидсозии инфрасохтори хоҷагии оби мамлакат  соли 2015 Ҳукумати Ҷумҳурии Тоҷикистон «Барномаи ислоҳоти соҳаи оби Тоҷикистон барои солҳои 2016-2025»-ро қабул намуд. Барои татбиқи ин чорабинӣ 1,8 миллиард сомонӣ пешбинӣ шудааст. Қисми зиёди ин маблағҳо барои татбиқи чорабинии вобаста ба барқарорсозии инфрасохтори об пешбинӣ шудааст»,- илова намуд Ш.Худобахш.

Иштирокдорони ҳамоиш доир ба мушкилоти норасоии об дар минтақаҳои мухталифи мамлакат изҳори назар карда, умед бар он доштанд, ки мушкилӣ   марҳила ба марҳила бартараф хоҳад шуд.

Июнь 25, 2019 14:00

Хабарҳои дигари ин бахш

Беш аз 80 ҳазор нафақагирони шаҳри Душанбе аз индексатсия баҳраманд шуданд
Озмуни ҷумҳуриявии нонпазии «Зеби дастархон» ҷамъбаст шуд
Намояндаи Тоҷикистон дар Форуми байналмилалӣ оид ба таҷрибаи Тоҷикистон дар омӯзиши бозори меҳнат сухан гуфт
Раиси Шурои уламои Тоҷикистон бо медали фахрии Анҷумани роҳбарони динҳои ҷаҳонӣ ва суннатӣ сарфароз гардонида шуд
Дар Суғд Форуми Муколамаи занони Осиёи Марказӣ баргузор мешавад
МАСЛИҲАТИ МУТАХАССИС. Хӯрдани анҷир хавфи бемории дилро кам менамояд
35-СОЛАГИИ ИСТИҚЛОЛИ ДАВЛАТӢ. Барои кормандони соҳаи ҳифзи муҳити зист 4 бинои маъмурӣ ба истифода дода мешавад
Истеъмоли хурмо узви босираро мустаҳкам намуда, пеш аз муҳлат пиршавии баданро пешгирӣ менамояд
21 СЕНТЯБР — РӮЗИ БАЙНАЛМИЛАЛИИ СУЛҲ. Тоҷикистон дар роҳи таҳкими сулҳ ва амният дар ҷаҳон пешсаф аст
То соли 2050 ҳарорати миёнаи ҳаво дар минтақаи Осиёи Марказӣ метавонад аз 0,8 то 6,2 дараҷа баланд гардад
Дар шаҳри Гулистон ҳамоиши ҷавонон баргузор шуд
«ТАСАЛЛО». Барои кӯдакони гирифтори бемории саратон шуъбаи махсус ифтитоҳ гардид