«Саҳми академик Фозил Тоҳиров дар рушди илми ҳуқуқ дар замони соҳибистиқлолии Тоҷикистон назаррас аст», -бардошт аз ҳамоиши илмии байналмилалӣ

Июнь 21, 2019 17:10

ДУШАНБЕ, 21.06.2019. /АМИТ «Ховар»/. «Рушди илми ҳуқуқ дар замони соҳибистиқлолии Тоҷикистон»- таҳти чунин унвон имрӯз дар  Академияи илмҳои Ҷумҳурии Тоҷикистон конференсияи байналмилалӣ доир гардид. Ҳамоиши илмӣ ба бузургдошти 80-солагии академики Академияи илмҳои Ҷумҳурии Тоҷикистон, Арбоби илм ва техникаи  Ҷумҳурии Тоҷикистон, доктори илмҳои ҳуқуқ, профессор Фозил Тоҳиров бахшида шуд.

Хабарнигори АМИТ «Ховар» иттилоъ дод, ки конференсияро ноиби президенти Академияи илмҳо, академик Ҳикмат Муъминов ҳусни оғоз бахшида, академик Фозил Тоҳировро ба фаъолияти беш аз 60 солаи илмиию омӯзгорӣ ва ҷамъиятӣ табрик намуд. Сипас Ёрдамчии Президенти Ҷумҳурии Тоҷикистон оид ба масъалаҳои ҳуқуқӣ, доктори илмҳои ҳуқуқ, профессор Зариф Ализода, мушовири бахши Ёрдамчии Президенти Ҷумҳурии Тоҷикистон  оид ба масъалаҳои  рушди иҷтимоӣ ва робита  бо ҷомеа, доктори илмҳои филологӣ, профессор Масрур Абдуллозода, раиси Кумитаи Маҷлиси намояндагони Маҷлиси Олии Ҷумҳурии Тоҷикистон, доктори илмҳои ҳуқуқ, профессор Ҷӯрахон Маҷидзода, ректори Донишгоҳи миллии Тоҷикистон, академик Муҳаммадюсуф Имомзода ва дигарон дар бораи ҳаёту фаъолияти эҷодии олим ва нақши ӯ дар рушди илми ҳуқуқ андешаҳояшонро баён карданд.

Зикр гардид, ки номбурда дар тӯли фаъолияти хеш дар рушди илми ҳуқуқшиноси саҳми арзанда гузошта, муаллифи беш аз 300 асарҳои илмӣ, аз ҷумла  9 монография, 15 китоби дарсӣ ва васоити таълимӣ мебошад. Консепсияи илмӣ ва муқаррароти назариявии асарҳои Фозил Тоҳиров дар тадқиқоти минбаъдаи шогирдонаш рушду такомул ёфтаанд. Зери роҳбарии ӯ 22 номзад ва 8 доктори илм тарбия ёфта, рисолаҳои худро дифоъ кардаанд.

Хизмати содиқонаи Фозил Тоҳиров дар таърихи муосири илми ҳуқуқшиносӣ ситораи дурахшон ва хазинаи беназири манобеи илми ҳуқуқ мебошад. Ӯ дар саромади илми таърихи ҳуқуқии миллат қарор гирифта, барои эъмори ҳуқуқии миллӣ, бунёди ҷомеаи шаҳрвандӣ давлати демократӣ беҳтарин ганҷина ва падидаҳои давлатию ҳуқуқии ниёгонро ба риштаи таҳлил кашида, ҷиҳати эҳёи ақлонии онҳо дар замони муосир фикру таклифҳои судманд пешниҳод кардааст.

Дар кори конференсияи байналмилалӣ донишмандону  муҳаққиқони кишварҳои Тоҷикистон, Россия ва Қазоқистон, ҳамкасбон, наздикон ва шогирдон иштирок доштанд.

Мавриди зикр аст, ки рисолаи номзадии Фозил Тоҳиров, ки соли 1971 зери роҳбарии профессор Р. Гимпелевич таҳти унвони «Мақомоти олии ҳокимияти давлатии ҶМШС Тоҷикистон» бо муваффақият ҳимоя карда шуд, ки падидаи нодири илмӣ дар ҷумҳурӣ ба шумор меравад. Олими пуркор мавзӯи ташаккули марҳалаҳою ҷанбаъҳои ҳуқуқии мақомоти идоракунии давлатиро дар Тоҷикистон бо фарогирии масоили иҷтимоию сиёсӣ пайгирӣ карда, баъди 17 соли заҳмати мӯшикофона ва омӯзишу таҳқиқи  фарогир дар мавзӯи «Инкишофи ҳуқуқи советӣ дар Тоҷикистон» соли 1988 дар Донишгоҳи давлатии Москва рисолаи доктории худро дифоъ намуд. Самтҳои фаъолияти илмию таҳқиқотии олими маъруфро ба се давра-то инқилобӣ, Шӯравӣ ва соҳибистиқлолии Ҷумҳурии Тоҷикистон метавон ҷудо намуд.

Фозил Тоҳиров  пас аз ҳимояи рисолаи докторӣ ва соҳиби унвони профессор гардидан дар соҳаҳои мухталифи тадқиқи масъалаҳои ҳуқуқии мамлакат, такмили қонунгузории амалкунанда, ислоҳоти низоми ҳуқуқӣ вобаста ба тағйироту дигаргуниҳои сиёсию иҷтимоие, ки дар ҷумҳурӣ ба амал омадаанд, ташаккули минбаъдаи ҷанбаҳои қонунгузорӣ дар мақомоти идоракунии давлатӣ, тарбияи олимони ҷавон дар соҳаи илмҳои ҳуқуқшиносӣ ва амсоли ин корҳои зиёдро анҷом додаст.

Академик Ф.Тоҳиров  барои хизматҳои шоён дар таълим ва тарбияи мутахассисони соҳаи ҳуқуқ бо медалу ифтихорнома ва ҷоизаҳо қадрдонӣ шудааст. Аз ҷумла, соли 1970 бо медали «Барои меҳнати шоиста», соли 1977 ба унвони ифтихории «Арбоби илм ва техникаи Тоҷикистон», соли 2002 ба муносибати 10-солагии Иҷлосияи 16 Шӯрои Олии Тоҷикистон бо медали «Иҷлосияи 16 Шӯрои Олии Тоҷикистон» ва соли 2011 бо медали «20-солагии Истиқлолияти Тоҷикистон» мукофотонида шудааст.

 

Мавҷуда АНВАРӢ,
АМИТ «Ховар»

Июнь 21, 2019 17:10

Хабарҳои дигари ин бахш

Шоҳҷоизаи Синамоҷашнвораи дуюми байналмилалии «Тоҷи Сомон»-ро коргардони тоҷик Муҳиддин Музаффар соҳиб шуд
«КИТОБИ ДУШАНБЕ». Пагоҳ дар Душанбе намоиши сенздаҳуми байналмилалӣ оғоз мегардад
Эмомалӣ Раҳмон: «Таҷлили Меҳргон далели эҳтиром ба фарҳанги қадима ва суннатҳои созандаи миллати тоҷик аст»
Имрӯз дар Фестивали «Оши палов» намудҳои гуногуни ин таоми миллӣ омода карда шуданд
СЕБҲОИ ТОҶИКИСТОН БО ТАМЪИ ЛАЗИЗАШОН МАШҲУРАНД. Дар Душанбе Иди себ ва ангур таҷлил гардид
Дар Душанбе Иди Меҳргон ба таври тантанавӣ таҷлил гардид
Имрӯз ҷашни Меҳргон бо баргузории Фестивал-намоиши маҳсулот ва техникаи кишоварзӣ оғоз мегардад
Даври ҷамъбастии Фестивал-озмуни ҷумҳуриявии телевизионии эҷодиёти халқ «Андалеб-2025» баргузор мегардад
Сокинони ноҳияи Муъминобод соҳиби туҳфаи арзишманди Пешвои миллат — «Шоҳнома» мегарданд
МЕҲРГОН ОМАД, МУБОРАК, МЕҲРГОН ОМАД! Пагоҳ дар Душанбе Иди Меҳргон бо шукуҳу шаҳомати хосса таҷлил мегардад
СИТОРАИ ТОБНОК ДАР САМОИ СИНАМО. Офаридаҳои баландмазмун ба Бахтиёр Худойназаров шуҳрати ҷаҳонӣ бахшид
Коргардон Аҳмад Аминӣ: «Эрониҳо Тоҷикистонро дӯст медоранду орзуи тамошои манзараҳои нотакрори онро доранд»