ДУШАНБЕ, 05.06.2019 /АМИТ «Ховар»/. Имрӯз  яке аз шаҳрҳои ҷанубии Федератсияи Россия — Анапа мизбони  ҷаласаи Шӯрои вазирони мудофиаи давлатҳои аъзои Иттиҳоди Давлатҳои Мустақил  мегардад. Дар ин бора ба АМИТ «Ховар» сардори маркази матбуоти Вазорати мудофиаи ҷумҳурӣ, подполковник Ориф Нозимиён иттилоъ дод.

Ба иттилои манбаъ, дар ҷаласаи зикргардида  Вазири мудофиаи Ҷумҳурии Тоҷикистон, генерал-полковник Шералӣ  Мирзо иштирок менамояд.

Дар кори ҷаласа инчунин Раиси Кумитаи иҷроияи ИДМ- котиби иҷроияи ИДМ Сергей Лебедев иштирок хоҳад кард.

Интизор меравад, ки дар ҷаласа вазирони мудофиаи ИДМ беш аз бист масъалаи мубрами вобаста ба вазъи ҳарбӣ-сиёсӣ дар ҷаҳон ва таъсири он ба авзои амнияти кишварҳои ИДМ, усулҳои консептуалии рушди ҳамкории низомӣ миёни кишварҳои узви ИДМ то соли 2025, таҷрибаи ба эътидол овардани баъдиҷангӣ дар Ҷумҳурии Арабии Сурияро баррасӣ намоянд.

Инчунин Вазирони мудофиаи ИДМ баргузории машқҳои  муштараки низомии неруҳои тирандози ҷангӣ низоми муттаҳидаи дифоъии зиддиҳавоии  ИДМ — «Боевое Содружество-2019» , ки дар соли равон пешбинӣ шудааст, самтҳои асосии ҳамкорӣ дар  соҳаи истифодаи  авиатсияи бесарнишин ва мубориза бо воситаҳо  ва дастгоҳҳои  бесарнишини  ҳавоии парвозкунанда, чорабиниҳои муштараки Қувваҳои Мусаллаҳи давлатҳои ИДМ –ро дар соли 2020 матраҳ хоҳанд кард.

Дар  ҷаласа ҳамзамон доир ба рушди ҳамкорӣ  дар соҳаи мудофиаи зиддиҳавоӣ, варзиш ва омода намудани мутахассисон сухан хоҳад рафт.

Ғайр аз ин  аъзои Шӯро иҷрои Нақшаи татбиқи Консепсияи рушди системаи ягонаи маълумоти ҷуғрофии таъйиноти низомидоштаро  барои неруҳои мусаллаҳи кишварҳои узви ИДМ, тағйиру иловаҳо ба Низомномаи Кумитаи ҳамоҳангсози хадамоти топографии Қувваҳои Мусаллаҳ дар назди Шӯрои вазирони мудофиаро баррасӣ менамоянд.

Дар ҷаласа аъзои Шӯро санаи баргузорӣ ва рӯзномаи вохӯрии ояндаи вазирони мудофиаи ИДМ-ро муайян хоҳанд кард.

Бояд тазаккур дод, ки Шӯрои вазирони мудофиаи давлатҳои аъзои ИДМ соли 1992 таъсис дода шуда, ба ҳайати он Арманистон, Беларус, Озарбойҷон, Россия, Тоҷикистон, Ӯзбекистон, Қазоқистон ва Қирғизистон шомиланд.

Шӯро ҳамкории низомии кишварҳои ИДМ-ро ҳамоҳанг  сохта, усулҳои консептуалии марбут ба масъалаҳои сиёсати ҳарбиро баррасӣ намуда, инчунин  пешниҳодотро  оид ба амалӣ намудани кӯшишҳои ба пешгирии муноқишаи мусаллаҳона нигаронидашударо таҳия месозад.

Ҳамзамон  рисолати Шӯрои вазирони мудофиаи ИДМ аз баррасии  лоиҳаи шартномаҳо ва дигар ҳуҷҷатҳои марбут ба масъалаҳои мудофиа ва сохтмонҳои ҳарбӣ,  таҳияи пешниҳодотҳо  барои наздикунонии  санадҳои ҳуқуқии соҳа ва дигар масъалаҳои марбут ба ҳамкории низомӣ иборат  аст.