Бунёди миллии иҷтимоии маблағгузорӣ то соли 2020 дар вилояти Хатлон 12 бинои таълимии замонавӣ месозад

Июль 31, 2019 13:40

ДУШАНБЕ, 31.07.2019. /АМИТ «Ховар»/. Тибқи Барномаи «Фондҳои ҷамоавӣ барои мусоидати рушди маълумоти асосӣ ва барқарорсозии инфрасохтори коммуналӣ» дар марҳилаи IV то соли 2020 дар 12 шаҳру ноҳияҳои вилояти Хатлон амалисозии 12 лоиҳаи мактабии дорои 6, 8 ва 10 синфхона пешбинӣ шудааст. Ин нуктаро имрӯз зимни нишасти матбуотӣ директори иҷроияи  Бунёди миллии иҷтимоии маблағгузории Тоҷикистон (БМИМТ)  Шералӣ Сиддиқзода иброз дошт.

Бунёди миллии иҷтимоии маблағгузории Тоҷикистон ҳоло дар 12 шаҳру ноҳияҳои вилояти Хатлон барномаҳои худро амалӣ намуда истодааст.

Ба зикри номбурда, аз ин теъдод дутоаш (дар ноҳияи Данғара ва шахри Левакант) муассисаҳои таълимии нав мебошанд, ки пештар вуҷуд надоштанд. Сохтмони биноҳои таълимии дигар, ки дар ноҳияҳои А.Ҷомӣ, Хуросон, Кўшониён, Вахш, Балҷувон, Восеъ, Ховалинг, Муъминобод, Ш.Шоҳин ва шаҳри Кӯлоб амалӣ мегарданд, дар ҳудуди муассисаҳои таҳсилоти миёнаи умумӣ ба нақша гирифта шудаанд. Лоиҳаҳои мактабӣ, ба ғайр аз бинои таълимӣ, инчунин сохтмони нуқтаҳои санитарӣ, таъмини мактабҳои лоиҳавӣ бо шабакаи мустақили гармидиҳӣ ва неруи барқро низ фаро мегиранд.

«Мақсади асосии барнома- ин беҳтар намудани шароити таҳсил дар муассисаҳои таҳсилоти ибтидоӣ ва миёнаи умумии шаҳру ноҳияҳои фарогир тавассути бунёди биноҳои нави мактабӣ ва таъмини таҷҳизоту инфрасохтори онҳо бо истифодаи сифати мувофиқ, инчунин омӯзиши ассотсиатсияҳои волидону омӯзгорон дар мактабҳои лоиҳавӣ мебошад», — афзуд Шералӣ Сиддиқзода.

Гуфта шуд, ки дар шаш моҳ дар доираи татбиқи марҳилаи чоруми барнома як зумра корҳо, аз ҷумла арзёбии лоиҳаҳои мактабӣ, гузаронидани савдо-озмунҳо барои интихоб ва бастани шартномаҳо бо ташкилотҳои пудратӣ, омӯзишӣ, иҷрои корҳои сохтмонӣ дар лоиҳаҳои мактабӣ, доир намудани чорабиниҳои омӯзишӣ, гузаронидани мониторингҳо ва дигар корҳои марбут ба лоиҳа анҷом дода шудаанд.

Ёдовар мешавем, ки Бунёди миллии иҷтимоии маблағгузории Тоҷикистон давоми фаъолияти худ зиёда аз 700 лоиҳа амалӣ намудааст, ки дар заминаи ҳамкории Ҳукумати Ҷумҳурии Тоҷикистон бо созмонҳои молиявии кишварҳои дигар рӯи кор омадааст. Фаъолияти БМИМТ аз татбиқи Лоиҳаи таҷрибавии паст кардани сатҳи камбизоатӣ соли 1997 оғоз меёбад, ки асосан бо маблағҳои қарзии Бонки ҷаҳонӣ ва ҳиссагузории Ҳукумати мамлакат амалӣ шудааст.

Июль 31, 2019 13:40

Хабарҳои дигари ин бахш

Сарвазири мамлакат Қоҳир Расулзода дар ноҳияи Дӯстӣ бо рафти ҷамъоварии ҳосили пахта ва корҳои созандагӣ шинос гардид
Доир ба заминаҳо, таҳаввулот ва дурнамои Истиқлоли давлатӣ машварати илмӣ-назариявӣ баргузор шуд
Дар ноҳияи Рӯшон майдончаҳои варзишӣ ба истифода дода шуданд
Дар Душанбе таҳкими ҳамкорӣ вобаста ба конфронси СИТЕС баррасӣ шуд
Шуруъ аз 16 сентябр дар масири Сиан-Душанбе парвозҳои мустақими ҳавоӣ оғоз мегарданд
Ба намояндагони касбу кори гуногуни вилояти Хатлон мукофотҳои давлатӣ тақдим карда шуд
Тоҷикистон ва Иттиҳоди Аврупо ҳамкориро дар соҳаи энергетика ва захираҳои об тақвият медиҳанд
Сарвазири мамлакат Қоҳир Расулзода дар ноҳияи Кӯшониён бо ҷараёни корҳои созандагӣ ва хоҷагидорӣ шинос шуд
Сиёсати Тоҷикистон дар самти идоракунии ҳамгироёнаи захираҳои об дар Шветсия муаррифӣ карда шуд
Бонки аврупоии таҷдид ва рушд барои таҷдиди низоми нақлиёти шаҳри Душанбе маблағ ҷудо менамояд
Сарвазири Тоҷикистон Қоҳир Расулзода дар ноҳияи Хуросон бо корҳои ободонию созандагӣ шинос шуд
СОҲИБИХТИЁРӢ — АРЗИШИ БУЗУРГУ БЕБАҲО. Нақши Пешвои миллат дар таҳкими истиқлоли давлатӣ беназир аст