Дар Душанбе мулоқоти сатҳи баланди намояндагони Тоҷикистон ва Ҳиндустон дар соҳаи кор бо ҷавонон баргузор гардид

ДУШАНБЕ, 21.09.2019 /АМИТ «Ховар»/. Имрӯз дар доираи баргузории аввалин Форуми ҷавонони Тоҷикистону Ҳиндустон мулоқоти сатҳи баланди намояндагони ҳарду давлат дар соҳаи кор бо ҷавонон доир гардид. Дар ин бора АМИТ «Ховар» бо истинод ба Кумитаи ҷавонон ва варзиши назди Ҳукумати Ҷумҳурии Тоҷикистон хабар медиҳад.

Дар мулоқоти мазкур ҳайати расмии Ҷумҳурии Тоҷикистонро раиси Кумитаи кор бо ҷавонон ва варзиши назди Ҳукумати мамлакат Аҳтам Абдуллозода ва ҳайати расмии Ҷумҳурии Ҳиндустонро Навин Равот аз Вазорати ҷавонон ва варзиши ин кишвар роҳбарӣ намуданд.

Дар оғоз А. Абдуллозода меҳмононро ба Тоҷикистон хайрамақдам намуда, иброз дошт, ки амалишавии муносибатҳои дӯстонаи Тоҷикистон ва Ҳиндустон дар самти кор бо ҷавонон дар пояи сиёсати оқилонаи Роҳбарони ҳарду давлат равона гардидааст.

Н. Равот барои пазироии гарму самимӣ ба роҳбарияти Кумитаи кор бо ҷавонон ва варзиши ҷумҳурӣ миннатдорӣ баён намуда, зикр намуд, ки муносибатҳои дӯстонаи Тоҷикистону Ҳиндустон барои таҳкими дӯстии ҷавонон ва табодули таҷрибаи онҳо заминагузорӣ менамояд.

Зимни мулоқот вобаста ба масъалаи таҳкими ҳамкории муштарак, ташкил ва ба роҳ мондани форуму конфронсҳо, ташкили чорабиниҳои гуногун ва табодули таҷриба миёни ҷавонони ҳарду кишвар ибрози назар карда шуд.

Бояд тазаккур дод, ки субҳи имрӯз қабл аз мулоқот ҳайати расмии ҷавонони Ҳиндустон дар майдони «Дӯстӣ» – и шаҳри Душанбе ҳамчун рамзи эҳтиром ба давлат ва миллати тоҷикон дар пояи муҷассамаи шоҳ Исмоили Сомонӣ гулчанбар гузошт.

Дар ин маросим ҳайати расмии ҷавонони Ҳиндустонро муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Дилноза Аҳмадзода ва дигар шахсони расмӣ ҳамроҳӣ намуданд.

Ҳамчунин имрӯз ҳайати меҳмонон аз Осорхонаи «Шарафи олимпӣ»- и Кумитаи миллии олимпии мамлакат  дидан намуда, бо дастовардҳои олимпичиёни тоҷик ва таърихи варзиши миллати тоҷик аз наздик шинос гардид.

Ба меҳмонон иттилоъ дода шуд, ки Осорхонаи Кумитаи миллии олимпии Тоҷикистон дар заминаи сиёсати варзишпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соли 2017 мавриди баҳрабардорӣ қарор дода шуда, дар он дастовардҳои варзишгарони тоҷик нигоҳ дошта мешаванд.

Мавриди зикр аст, ки аз 21 то 27 сентябри соли 2019 дар Тоҷикистон аввалин Форуми ҷавонони Тоҷикистону Ҳиндустон бо иштироки ҳайатҳои ҷавонони ҳарду давлат баргузор мегардад. Дар доираи баргузории Форуми мазкур силсилачорабиниҳои гуногуни маърифатию фарҳангӣ, варзишӣ ва сайёҳӣ дар назар дошта шудаанд.

Ёдовар мешавем, ки дар доираи сиёсати ҷавонпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамкории Кумитаи кор бо ҷавонон ва варзиш дар самти амалисозии сиёсати давлатии ҷавонон бо вазорату идораҳои марбутаи дигар давлатҳои хориҷӣ густариш меёбад.