Дар Донишкадаи давлатии фарҳанг ва санъат ҷашни Меҳргон ва намоиши ҳунарҳои мардумӣ баргузор шуд

Октябрь 28, 2019 09:40

ДУШАНБЕ, 28.10.2019 /АМИТ «Ховар»/. 27 октябр дар Донишкадаи давлатии фарҳанг ва санъати Тоҷикистон ба номи Мирзо Турсунзода дар доираи Фестивали байналмилии «Шарқ-Ғарб: анъанаҳои мусиқӣ ва ҳунарҳои мардумии Авруосиё дар фазои фарҳангии Иттиҳоди Давлатҳои Мустақил» ҷашни Меҳргон ва намоиши ҳунарҳои мардумии кишварҳои иштироккунандаи фестивал баргузор шуд.

Омӯзгорону донишҷӯёни донишкада меҳмонон ва намояндагони давлатҳои  Россия, Қазоқистон, Ӯзбекистон ва Қирғизистонро, ки онҳоро Вазири  фарҳанги ҷумҳурӣ Шамсиддин Орунбекзода ҳамроҳӣ мекард, бо карнаю сурнай ва нону намак пешвоз гирифтанд.

Ректори Донишкадаи давлатии фарҳанг ва санъати Тоҷикистон, профессор Хайриддин Усмонзода ташрифи меҳмононро ба Тоҷикистон хайрамақдам гуфт.

Ҳамчунин ӯ зикр намуд, ки ба намоиш гузоштани   намунаҳои гуногуни ҳунарҳои миллӣ- ин таҷассуми нақши  пурҷилои ҳунарҳои мардумии кишварҳои Иттиҳоди Давлатҳои Мустақил мебошад.  Бояд гуфт, ки дар намоишгоҳ намунаҳои гуногуни ҳунари дасти ҳунармандон, ки бештари онҳо ҳунарҳои миллӣ- мардумӣ мебошанд, ба маъраз гузошта шуда буд. Мақсад ва рисолати он зинда кардан, нигоҳ доштан ва инкишофу идома бахшидани фарҳанги гуногуншакли Иттиҳоди Давлатҳои Мустақил мебошад.

«Ман бо боварӣ метавонам гӯям, ки  чунин фестивалҳо имкон медиҳанд  алоқаҳои васеи инсондӯстӣ густариш ёфта, халқу миллатҳо ба ҳам  наздиктар гарданд»,- гуфт Хайриддин Усмонзода.

Сипас меҳмонон ва иштирокчиёни Фестивали байналмилии «Шарқ- Ғарб: анъанаҳои мусиқӣ ва ҳунарҳои мардумии Авруосиё дар фазои  фарҳангии Иттиҳоди Давлатҳои Мустақил»   аз намоишгоҳи ҳунарҳои мардумии кишварҳои иштироккунандаи фестивал дидан намуда, ба он баҳои баланд доданд.

Бояд гуфт, ки дар намоишгоҳ намояндагони  Россия ҳунарҳои дӯзандагӣ ва зочасозиро пешниҳоди тамошобинон гардониданд. Намояндагони Ҷумҳурии Ӯзбекистон  бо муҳра оро додани хонаи арӯсро ба тамошо гузоштанд. Гӯшаи ҳунарҳои Ҷумҳурии Қирғизистонро кулоҳу либосҳои мардумӣ зеб медод. Аз Қазоқистон   сару либоси ороишиии қазоқӣ пешниҳод гардида буд.

Дар гӯшаи дигари намоишгоҳ меваю сабзавоти тару тоза пешниҳоди тамошобинон гардонида шуд, ки он ифодагари ҷашни Меҳргон мебошад.

Меҳргон дар қатори ҷашни Наврӯз яке аз ҷашнҳои  муқаддасу мондагори миллати куҳанбунёди тоҷик буда,  тибқи Қонуни Ҷумҳурии Тоҷикистон «Дар бораи рӯзҳои ид» ҳар сол моҳи октябр ҷашн гирифта  мешавад. Нахуст, ҷашни Меҳргон тантанаи фаровонию ҳосилот аст.      Меҳргон яке аз куҳантарин ҷашнҳои мардуми ориёинажод буда, гузаштагонамон онро ҳамчун ситоишу ниёиши Меҳр ва рамзи аҳду паймон ва дӯстиву муҳаббат таъбир додаанд.

Дар қисмати фарҳангӣ донишҷӯён бо суруду тарона ва саҳнаҳои ҷолиб хотири иштирокдоронро болида гардониданд.

Ёдовар мешавем, ки Фестивали байналмилии «Шарқ- Ғарб: анъанаҳои мусиқӣ ва ҳунарҳои мардумии Авруосиё дар фазои  фарҳангии Иттиҳоди давлатҳои Мустақил»   то 29 октябр доир гардида, меҳмонон аз Қалъаи Ҳисор ва Кохи Наврӯз дидан менамоянд.

Октябрь 28, 2019 09:40

Хабарҳои дигари ин бахш

Аксари ҳунармандони «Оркестри симфонии кӯдакон ва наврасон» ғолибони Озмуни ҷумҳуриявии «Тоҷикистон — Ватани азизи ман» мебошанд
Дар Вазорати фарҳанг оид ба нақши муассисаҳои фарҳанг дар рушди маънавиёти ҷомеа ҳамоиш доир шуд
«ОФТОБИ НАЗМИ ОЛАМ». Дар Душанбе бахшида ба бузургдошти 700-солагии Ҳофизи Шерозӣ ҳамоиш баргузор гардид
Дар Париж барномаи фарҳангии Шашмақом баргузор гардид
ПАНДИ ҲОФИЗ — ҲИДОЯТГАРИ ИНСОНҲО БА СӮИ КАМОЛОТИ МАЪНАВӢ. Бардошт аз конфронси илмӣ-байналмилалӣ дар ЮНЕСКО
Дар қароргоҳи ЮНЕСКО ба ифтихори 700-солагии Ҳофизи Шерозӣ намоиши ҷашнӣ ифтитоҳ гардид
Тоҷикистон дар қароргоҳи ЮНЕСКО 700-солагии Ҳофизи Шерозиро таҷлил менамояд
Даври дуюми Озмуни ҷумҳуриявии «Тоҷикистон — Ватани азизи ман» оғоз гардид
Дар Академияи миллии илмҳои Тоҷикистон бахшида ба Рӯзи Ваҳдати миллӣ конференсияи ҷумҳуриявӣ баргузор гардид
Дар Осорхонаи миллӣ намоиши офаридаҳои наққош ва муҷассамасози маъруф Амонуллоҳ Ҳайдарзод ифтитоҳ ёфт
Академияи миллии илмҳои Тоҷикистон аккредитатсияи байналмилалии муассисавиро гузашт
ДАР ҲАР ЯК ОҲАНГ МУҲАББАТИ БЕАНДОЗАИ ТОҶИКОН БА ВАТАН ЭҲСОС МЕШУД. Бардошт аз баргузории Рӯзҳои фарҳанги Тоҷикистон дар Русия