Рӯзномаи британии «The Guardian» дарвозабони дастаи мунтахаби ҷавонони Тоҷикистон Муҳриддин Ҳасановро ба шастгонаи футболбозони боистеъдоди ҷаҳон дохил кард

ДУШАНБЕ, 11.10.2019 /АМИТ «Ховар»/. Рӯзномаи британии «The Guardian» дарвозабони дастаи мунтахаби ҷавонони Тоҷикистон ва дастаи футболи «Парвоз» Муҳриддин Ҳасановро ба шастгонаи футболбозони боистеъдоди соли таваллудашон 2002 дохил кард. Дар ин бора АМИТ «Ховар» бо истинод ба Федератсияи футболи Тоҷикистон хабар дод.

«The Guardian», аз ҷумла,  менависад: «Дарвозабони дастаи мунтахаби ҷавонони Тоҷикистон Муҳриддин Ҳасанов барои ба финали Чемпионати Осиё-2018 миёни 16-солаҳо баромадани дастаи Тоҷикистон ситораи гардид. Муҳриддин Ҳасанов дар баргардонидани ҷаримаҳои 11-метра (пеналтӣ) дар бозиҳо бар муқобили дастаҳои Кореяи Шимолӣ ва Кореяи Ҷанубӣ маҳорат нишон дод. Ӯ мақсади ба Аврупо рафтан дорад ва дастаҳои Россия аллакай ба ӯ таваҷҷуҳ зоҳир мекунанд».

Ба ин рӯйхат инчунин бозигарони дастаҳои футболи «Барселона»-и Испания Ансу Фати, «Интер»-и Италия Люсиен Агум, «ПСЖ»-и Франсия Адил Аушиш ва Нянзу Куасси, «Бавария»-и Германия Малик Тиллман, «Реал Мадрид»-и Испания Андри Лукас Гудёонсен, «Ювентус»-и Италия Пабло Морено ва «Бунёдкор»-и Ӯзбекистон Ҷасур Ҷалолиддинов шомиланд.