Донишҷӯёни Тоҷикистон дар консерти бошукӯҳи фестивали «Москва моро дӯст кард» бо мукофотҳо қадрдонӣ мешаванд

ДУШАНБЕ, 15.11.2019 /АМИТ «Ховар»/. 15 ноябр дар Донишгоҳи дӯстии халқҳои Россия (RUDN) консерти калони Фестивали байналмилалии донишҷӯёни «Москва моро дӯст кард», баргузор мешавад. Дар ин бора аз маркази матбуоти Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Дар консерт  2 ҳазор нафар аз минтақаҳои гуногуни Федератсияи Россия, давлатҳои ИДМ ва Аврупо ширкат меварзанд. Дар радифи баромадкунандагони дигар донишҷӯёни тоҷикистонӣ низ, ки дар футбол ҷои аввалро гирифтанд, бо мукофотҳои олӣ сарфароз гардонида мешаванд.

Иштирокчиёни консерт ҳар яке бо эъҷози ҳунари хеш фарҳанги мардуми худро муаррифӣ менамоянд. Ансамбли «Аллон» аз Осетияи Шимолӣ, ансамбли “Барт”-и москвагӣ  аз Ингушистон ва Иттиҳодияи эҷодии «Қарабоғ» аз Озарбойҷон ҳунарнамоӣ мекунанд. Донишҷӯдухтарони  Гурҷистон дар якҷоягӣ бо ансамбли «Ингури» ҳунари худро ба ҳаводоронашон  тақдим менамоянд. Ҷумҳурии Доғистонро ансамбли “Бародар”  намояндагӣ хоҳад кард.

Имсол фестивал таҳти шиори «Санъати халқӣ дар ҳудуди Москва» баргузор мегардад. Дар намоишгоҳҳои миллӣ ба меҳмонон либосҳои анъанавӣ, таомҳо ва ашёи рӯзгор намоиш дода шуданд. Рӯзи сешанбе, 12 ноябр мизи мудаввар баргузор гардид. Ҳамзамон донишҷӯён қобилияти худро дар мусобиқаҳои варзишӣ ва зеҳнӣ санҷиданд.