Хатсайрҳои нав ва имкониятҳои сайёҳии Тоҷикистон муаррифӣ шуданд

Декабрь 16, 2019 16:03

ДУШАНБЕ, 16.12.2019. /АМИТ «Ховар»/. Имрӯз дар шаҳри Душанбе бо ташаббуси Кумитаи рушди сайёҳӣ имкониятҳои хизматрасонии сайёҳӣ ва хатсайрҳои нави туристӣ зимни як ҳамоиш бо иштироки роҳбарони ширкатҳои сайёҳӣ ва намояндагони бахшҳои марбута дар маҳал баргузор гардид, хабар медиҳад АМИТ «Ховар» бо истинод ба Кумитаи рушди сайёҳӣ.

Раиси Кумитаи рушди сайёҳӣ Нуъмон Абдуғаффорзода дар оғози ҳамоиш иброз дошт, ки бо мақсади муаррифии имкониятҳои сайёҳии мамлакат ва пешниҳоди маҳсулоти ҷолиби сайёҳӣ ба шаҳрвандони хориҷӣ маводи нави таблиғотӣ, аз ҷумла “Даҳ ганҷинаи Тоҷикистон” бо се забон, варианти электронии “Даҳ сабаби сафар ба Тоҷикистон” бо ду забон, наворҳои видеоии нав, аз ҷумла оид ба имкониятҳои сайёҳии якчанд шаҳру ноҳияҳо, сайёҳии табобатию солимгардонӣ, гиёҳҳои шифобахш, хатсайри сайёҳии Данғара-Пушинг, корномаи Восеъ, ҳафт хатсайри сайёҳӣ ба ноҳияҳои Балҷувону Ховалинг, Шамсиддини Шоҳин, шаҳрҳои Нораку Роғун, водии Рашт дар маҷмуъ зиёда аз 40 хатсайрҳои нави сайёҳӣ омода ва роҳандозӣ карда шуданд.

«Рўйхати васеи маҳсулоти сайёҳиро тартиб додан мумкин аст, аммо барои мусоидат ба пешбурди интихоби истеъмолӣ дар қадами аввал муайян намудани якчанд категорияҳои нисбатан содаи маҳсулоти сайёҳӣ беҳтар аст. Дар навбати аввал, ин категорияҳо бояд он маҳсулоти сайёҳиро, ки дар мамлакат бештар рушд ёфтаанд ва маблағгузориҳои нав ва зиёд талаб намекунанд, фаро гиранд. Ҳар як категория хусусиятҳои ба худ хос ва инкишоф дорад. Ҷолибнокии ин маҳсулоти сайёҳӣ метавонад тавассути мукаммалгардонии он ва пешниҳоди он ба миқдори зиёди муштариён баланд бардошта шавад», — тазаккур дод Н. Абдуғаффорзода.

Аслан сабади маҳсулоти сайёҳии Тоҷикистон бояд аз рӯи намудҳои сайёҳии экологӣ, табобатию солимгардонӣ, таърихию фарҳангӣ, кӯҳнавардӣ ва шикор ташаккул дода шавад.

Меҳмоннавозии мардуми мо аллакай афзалияти мамлакат аст. Вале айни замон дарки аҳамият ва фоидаи рушди сайёҳӣ дар доираи бахши хусусӣ на он қадар назаррас аст. Чун Роҳбарияти олии сиёсии мамлакат ба соҳаи сайёҳӣ таваҷҷуҳи хосса зоҳир намудаанд,  дар пайравӣ бо ташаббусҳои ҳукумати мамлакат ҳар яки моро зарур аст, ки аҳолиро дар рўҳияи дарки аҳамияти рушди соҳаи сайёҳӣ, таъсири он ба пешрафти мамлакат ва нақши ҳар як шахс дар рушди соҳа тарбия намоем.

Ҳамчунин доир ба мавзуъҳои мавриди таваҷҷуҳ роҳбарони як зумра ширкатҳои сайёҳӣ ибрози андеша намуданд ва миёни иштирокчиён табодули афкор сурат гирифт.

Декабрь 16, 2019 16:03

Хабарҳои дигари ин бахш

Дар даромадгоҳи дараи Камароб Маркази хизматрасонии сайёҳӣ ба истифода дода шуд
Донишгоҳи байналмилалии сайёҳӣ ва соҳибкории Тоҷикистон ҳамкориро бо ширкатҳои хориҷӣ тақвият мебахшад
Мотосиклронҳои «Ралли Осиёи Марказӣ-2025»-ро дар Тоҷикистон истиқбол гирифтанд
Нишасти муштарак байни роҳбарони ширкатҳои сайёҳии Тоҷикистон ва Эрон баргузор шуд
Ҷаласаи чоруми Гурӯҳи кории ҷумҳуриявӣ дар самти рушди сайёҳӣ доир шуд
Дар Бадахшон Форуми байналмилалии сайёҳӣ баргузор гардид
Рушди ҳамкории дуҷонибаи Тоҷикистон ва Белгия дар соҳаи сайёҳӣ баррасӣ гардид
Дар Конфедератсияи Швейтсария имконоту зарфияти сайёҳии Тоҷикистон муаррифӣ гардид
Ҷаласаи кумитаи тадорукоти «Намоишгоҳи байналмилалии сайёҳии Душанбе» доир гардид
Иқтидори сайёҳию рекреатсионии Тоҷикистон дар доираи таҳқиқи арзишманд муаррифӣ гардид
Дар Душанбе оид ба омодагӣ ба Форуми сармоягузорӣ дар соҳаи сайёҳӣ брифинг доир шуд
Телефони боварии Кумитаи рушди сайёҳӣ мушкили беш аз 30 ҷаҳонгарди хориҷиро бартараф намуд